ԱՄՆ նախագահի դեմոկրատ թեկնածու Հիլարի Քլինթոնը դեմ է արտահայտվել ԱՄՆ-ում Անդրխաղաղօվկիանոսյան գործընկերության՝ Ասիա-խաղաղօվկիանոսյան տարածաշրջանի 12 երկրների մասնակցությամբ ազատ առևտրի գոտու ստեղծման մասին համաձայնագրի վավերացմանը: NHK հեռուստաալիքի հաղորդմամբ՝ այս մասին նա հայտարարել է Նյու Յորքում Ճապոնիայի վարչապետ Սինձո Աբեի հետ հանդիպմանը:
Հաղորդվում է, որ Ճապոնիայի կառավարության ղեկավարը զրույցի ընթացքում հանդես է եկել հօգուտ Անդրխաղաղօվկիանոսյան գործընկերության մասին համաձայնագրի շուտափույթ գործողության մեջ դնելուն՝ պնդելով, որ դա զգալիորեն կխորացնի և կակտիվացնի տնտեսական կապերը խաղաղօվկիանոսյան տարածաշրջանում: Սակայն Քլինթոնն ի պատասխան կրկնել է, որ դեմ է Կոնգրեսում այս տարվա փետրվարին ստորագրված այդ փաստաթղթի վավերացմանը: Նրա կարծիքով՝ համաձայնագրով նախատեսված միջոցառումները կարող են վնասել ԱՄՆ-ում զբաղվածությանը:
ԱՄՆ նախագահ Բարաք Օբաման ակնկալում է մինչև իր նախագահության ժամկետի ավարտը հասնել Անդրխաղաղօվկիանոսյան գործընկերության մասին համաձայնագրի վավերացմանը:
Միևնույն ժամանակ, ԱՄՆ-ում շատ քաղաքական գործիչներ դեմ են այդպիսի պայմանավորվածությանը՝ համարելով, որ այն մրցակիցներին տալիս է միակողմանի շահեր: Բացի Քլինթոնից՝ համաձայնագրին դեմ է նրա մրցակից հանրապետական Դոնալդ Թրամփը:
