News Georgia լրատվական գործակալության փոխանցմամբ՝ Վրաստանի ԱԳՆ-ն դատապարտել է Մոսկվայի կողմից Աբխազիայում ու Ցխինվալի շրջանում ընտրատեղամասերի բացումը՝ կապված ՌԴ Պետդումայի ընտրությունների անցկացման հետ:
Ռուսաստանը Վրաստանի օկուպացված տարածքներում սեպտեմբերի 18-ին բացել է 21 ընտրատեղամաս՝ քվեարկության անցկացման համար: ՌԴ ԿԸՀ-ի տվյալներով՝ այդ շրջանների ավելի քան 114.000 բնակիչներ գրանցվել են որպես Ռուսաստանի այս կամ այն մարզերի ընտրողներ:
Վրաստանի ԱԳՆ-ն դատապարտել է ընտրատեղամասերի բացումը՝ դա որակելով որպես Մոսկվայի բռնազավթման քաղաքականության հերթական դրսևորում, ինչը կոպտորեն խախտում է միջազգային իրավունքի հիմնարար նորմերը:
«Ռուսաստանը դեռ 2000-ական թվականներից սկսել է Աբխազիայի ու Ցխինվալի շրջանի բնակիչների ապօրինի անձնագրային գործընթաց, որը նրանց ստիպել է մասնակցել 2011 և 2012 թվականներին Ռուսաստանում անցկացված խորհրդարանական ու նախագահական ընտրություններին»,- ասվում է Վրաստանի ԱԳՆ-ի հայտարարության մեջ:
