Ռուսական RIA Novosti պարբերականի փոխանցմամբ` միջազգային կոալիցիայի ինքնաթիռների հարվածների հետևանքով զոհվել է Սիրիայի բանակի 62 զինծառայող, և վիրավորվել շուրջ 100 մարդ: Այդ մասին հայտնել է Ռուսաստանի պաշտպանության նախարարության ներկայացուցիչ, գեներալ-մայոր Իգոր Կոնաշենկովը:
Նրա խոսքերով` շաբաթ օրը՝ սեպտեմբերի 17-ին, 17:00-ից 17:50-ն ընկած ժամանակահատվածում Դեյր էզ Զոր քաղաքի օդանավակայանի շրջանում հասցվել է չորս ավիահարված: Հարձակման ընթացքում օգտագործվել է երկու F-16 և երկու A10 ինքնաթիռ: Ինքնաթիռները Սիրիայի օդային տարածք են մտել Իրաքի սահմանի կողմից:
Հարվածից անմիջապես հետո ԴԱԻՇ-ի զինյալները անցել են հարձակման, նշում է Կոնաշենկովը: «Եթե այդ օդային հարվածի պատճառը թիրախի սխալ կոորդինատներ են, ապա դա ամերիկյան կողմի՝ Սիրիայում ահաբեկչական խմբավորումների դեմ պայքարում Ռուսաստանի հետ գործողությունները համակարգելու ցանկություն չունենալու ուղիղ հետևանքն է»,- ընդգծում է նա:
Ավելի վաղ Դամասկոսը հայտարարել էր, որ այդ ձևով ԱՄՆ-ը օգնում է ԴԱԻՇ-ի զինյալներին: Հրամանատարության հայտարարությունում նշվում է, որ ավիահարվածը դարձել է «Սիրիայի Արաբական Հանրապետության և նրա բանակի դեմ լուրջ և աղաղակող ագրեսիայի դրսևորում»:
Դամասկոսի գնահատականով` նման գործողությունները դարձել են այն բանի համոզիչ ապացույցը, որ ԱՄՆ-ը և իր դաշնակիցները աջակցում են ԴԱԻՇ-ին ու այլ ծայրահեղական խմբավորումներին, ինչը հակասում է ահաբեկչության դեմ պայքարի մասին Վաշինգտոնի հայտարարություններին:
