Բանգլադեշի բժիշկները անհանգստանում են վտանգավոր համաճարակների բռնկումից այն բանից հետո, երբ երկրի մայրաքաղաքի փողոցները հեղեղվել են արնաջրերով: Դրանք գոյացել են մուսուլմանական Կուրբան-բայրամ տոնակատարության ժամանակ մորթված կենդանիների արյան և անձրևաջրերի խառնվելու հետևանքով: Բժիշկներին հիմնականում անհանգստացնում է իրադրությունը արվարձաններում, որտեղ արնաջրերը կարող են ընկնել ջրանցքներ և ջրատար խողովակներ, հայտնում է BBC-ն:
«Անձրևաջրերի հետ խառնված արյունը քաղաքի փողոցներում անկասկած անհանգստանալու առիթ է: Այն կարող է առաջացնել ջրով փոխանցվող ցանկացած հիվանդություն, այդ թվում՝ փորլուծություն, խոլերա, հեպատիտ և այլն»,- ասել է պրեֆոսոր Հալեդ Նուրը Dhaka Tribune պարբերականին:
Նախօրյակին քաղաքային իշխանությունները թույլատրել են կենդանիներին մորթել միայն հատուկ որոշված վայրերում, սակայն քաղաքացիների մեծ մասը չեն կարողացել հասնել այնտեղ ուժեղ անձրևների պատճառով:
Արդյունքում Դաքքայի շատ բնակիչներ անասուններին մորթել են ստորգետնյա ավտոկայանտեղիներում, գարաժներում և նրբանցքներում, իսկ սպանված կենդանիների արյունը հոսել է հեղեղված փողոցներով: Ըստ տվյալների` վերջին օրերին Դաքքայում մորթվել է մոտ 100 հազար կենդանի:
