ԱՄՆ-ը որոշում է ընդունել ամերիկյան հատուկ նշանակության ջոկատների մոտ 40 մարտիկների ուղարկել Սիրիայի հյուսիս՝ օգնելու Թուրքիայի զինված ուժերին ԴԱԻՇ ահաբեկչական խմբավորման դեմ պայքարում։ Այս մասին հայտնում է Wall Street Journal-ը։
Պարբերականի զրուցակիցները հստակեցրել են, որ հատուկջոկատայինների ժամանումը Սիրիա սպասվում է առաջիկա օրերին։ Նրանց խոսքով՝ նրանք կմասնակցեն Թուրքիայի հետ համատեղ առաքելությանը Սիրիայի հյուսիսում գտնվող Դաբիկ քաղաքից արևելք։ Սիրիայում ամերիկացի հատուկջոկատայինների ընդհանուր թիվը չի գերազանցի 300-ը՝ ընդգծել են աղբյուրները։
Պարբերականի տվյալներով՝ ԱՄՆ-ի և Թուրքիայի համատեղ աշխատանքի ծրագիրը հաստատվել է ԱՄՆ նախագահ Բարաք Օբամայի կողմից այս շաբաթ։ Ինչպես հայտնել են պարբերականի աղբյուրները՝ այդ քայլը կոչված է ամրապնդելու հարաբերությունները ԱՄՆ դաշնակցի հետ ԴԱԻՇ-ի դեմ պայքարում։
