ԲՀԿ նախագահ Նաիրա Զոհրաբյանն Ազգային ժողովի ամբիոնից, ըստ էության, կոչ է արել ԲՀԿ խմբակցության այն պատգամավորներին, որոնք այլևս կուսակցության անդամ չեն, սակայն կուսակցության ցուցակով են դարձել պատգամավոր, վայր դնել մանդատը: Զոհրաբյանը հայտարարել է, որ այդ հարցը փորձելու են լուծել ԱԺ կանոնակարգ օրենքի փոփոխության շրջանակներում:
ԲՀԿ նախագահի հայտարարությունը ակնհայտորեն վերաբերում է Վարդան Օսկանյանին և նրա նոր կուսակցության այն անդամներին, որոնք ԱԺ պատգամավոր են և մանդատները ստացել էին ԲՀԿ 2012 թվականի համամասնական ցուցակով:
Փաստորեն, ստացվում է, որ խոսք է գնում Օսկանյանին և նրա կուսակցության անդամներին պատգամավորական մանդատից զրկելու մասին: Եվ սա՝ նախընտրական զարգացումներին ընդառաջ: Այսինքն՝ կարող է ստացվել այնպես, որ խորհրդարանական ընտրությունների շրջանում նախկին արտգործնախարարն ու նրա մի շարք կուսակիցներ այլևս չլինեն պատգամավորներ:
Ի՞նչ է սա նշանակում: Պատգամավորությունը ամբիոն է, դա որոշակի անցաթուղթ է և անձեռնմխելիություն: Այսինքն՝ ԲՀԿ նախագահը, ըստ էության, ակնարկում է, որ Վարդան Օսկանյանն ու նրա կուսակիցներն առաջիկայում, խորհրդարանական ընտրություններին ընդառաջ, կարող են զրկվել ամբիոնից և անձեռնմխելիությունից:
Մի կողմից՝ սա, իհարկե, առանձնապես մեծ կորուստ չէ, եթե հաշվի առնենք, որ ընդամենը մի քանի ամիս հետո ԱԺ բոլոր պատգամավորներն են վայր դնելու մանդատները: Սակայն այստեղ առանցքայինն այն է, որ խոսքը վերաբերում է նախընտրական շրջանին: Իսկ նախընտրական շրջանում պատգամավորությունը և անձեռնմխելիությունը չափազանց կարևոր ռեսուրսներ են, որոնցից փաստորեն Վարդան Օսկանյանի կուսակցությունը կարող է զրկվել:
Սա միայն ԲՀԿ-ի՞ նախաձեռնությունն է, որով այդ կուսակցությունը պարզապես փորձում է պոտենցիալ մրցակիցներին զրկել «իր հաշվին» ռեսուրսներից, թե՞ այս նախաձեռնությունը կարող է գալ իշխանությունից: Մի բան ակնհայտ է՝ առանց իշխանության այն, ըստ էության, չի կարող լուծում ստանալ կանոնակարգ օրենքի փոփոխության շրջանակում:
Եվ առավել հետաքրքրական է այն, որ Նաիրա Զոհրաբյանն այս մասին հայտարարում է ընտրություններից առաջ, և ԸՕ-ի շուրջ իշխանությունների հետ համաձայնության ստորագրումից հետո: Արդյո՞ք այս ակնարկով փորձ է արվում խաղի կանոնների շուրջ համաձայնության դաշտ բերել նաև Օսկանյանին, թե՞ պարզապես կայացվում է նրա կուսակցությանը խորհրդարանից 2017 թվականին դուրս թողնելու քաղաքական որոշում, որի առաջին քայլը կլինի արդեն 2017-ից առաջ դե ֆակտո դուրս թողնելը:
