Թուրքական Sabah թերթի փոխանցմամբ՝ Թուրքիայում իշխող «Արդարություն և զարգացում» կուսակցության (ԱԶԿ)՝ միջազգային հարցերով փոխնախագահ Աֆիֆ Դեմիրքըրանը Մալայզիայի մայրաքաղաք Կուալա Լումպուրում մասնակցել է Ասիայի երկրների քաղաքական կուսակցությունների 9-րդ միջազգային կոնֆերանսին:
Իր ելույթում Դեմիրքըրանը հայտարարել է, որ եվրոպական շատ առաջնորդներ ու մի շարք երկրների ղեկավարներ Թուրքիային չեն աջակցել ռազմական հեղաշրջման փորձի ժամանակ:
«Մենք պետք է համատեղ պայքարենք ահաբեկչության դեմ, սակայն երբ տեղի ունեցան հուլիսի 15-ի իրադարձությունները, եվրոպական շատ ղեկավարներ, ինչպես նաև մի շարք երկրների առաջնորդներ չարձագանքեցին ժամանակին, իսկ այդ օրերը շատ լարված էին մեզ համար»,- ասել է նա:
Դեմիրքըրանն ընդգծել է, որ Անկարան հույսեր է կապում Հարավարևելյան Ասիայի երկրների ասոցիացիայի անդամների աջակցության հետ՝ անկախ տարբեր երկրներում գոյություն ունեցող գաղափարախոսությունից:
