ՏԻՄ ընտրություններն արդեն թեժ հանգրվան են թևակոխում, առաջադրված մի քանի թեկնածուներ իրենց թեկնածությունը հանում են: ԲՀԿ խմբակցության առաջնորդը նախօրեին «Առաջին լրատվական»- ի հետ զրույցում նշեց, որ իշխանությունները թիրախավորել են իրենց կուսակցությունը: Նաիրա Զոհրաբյանի խոսքով՝ Մասիս քաղաքում ԲՀԿ թեկնածու Կարո Օհանյանը առևանգվել է և օրվա վերջում որոշել է չմասնակցել ընտրություններին:
Գյումրիում ևս ԲՀԿ քաղաքապետի թեկնածու Վարդևան Գրիգորյանը, ըստ ամենայնի, բավական լուրջ դժվարության առջև կարող է կանգնել, քանի որ ՀՀԿ-ի կողմից արդեն նշմարվում են ճնշումներ:
Անդրադառնալով այս դիտարկումներին՝ «Առաջին լրատվական»- ի հետ զրույցում ԱԺ ՀՀԿ խմբակցության քարտուղար Գագիկ Մելիքյանը նշեց, որ երբևէ նախընտրական գործընթացները զերծ չեն եղել նման խոսակցություններից. «Հիմնավոր լինելը դեռևս կհստակեցվի, բայց այն հանգամանքը, որ սովորաբար իշխանությունները փորձում են կոմպրոմատները ջրի երես հանել, դա խոսում է այն մասին, որ կոմպրոմատներ կան, իսկ եթե կան, դա արդեն խոսում է թեկնածուի խոցելիության մասին»:
Մասիսում քաղաքապետի ԲՀԿ թեկնածու Կարո Օհանյանի նկատմամբ ճնշումներ գործադրելու վերաբերյալ դիտարկմանը Գ. Մելիքյանն արձագանքեց, որ այդ մասին հայտարարությունները մերկապարանոց են:
Հուլիսյան իրադարձություները պետք է որ այլ տրամաբանության մեջ փոխադրեին ամբողջ հասարակությանը, իշխանությանը… Հասարկությունն այլ սպասումներ ունի: Ի՞նչ է արվում ժողովրդի վստահությունը վերականգնելու համար. այս հարցին ի պատասխան՝ Գ. Մելիքյանը նշեց. «Ժողովրդի վստահությունը վերականգնելու համար սահմանադրական փոփոխություններ իրականացվեցին, ինչն իր հետևանքները կունենա, փոփոխություններ կլինեն նաև ընտրական գործընթացների առումով: Հուլիսյան գործընթացից հետո ոչ միայն իշխանության, այլ նաև ցանկացած քաղաքական ուժի հիմնական զենքը պետք է լինի ժողովրդի քվեն,- ընդգծեց ՀՀԿ խմբակցության քարտուղարը և հավելեց, որ երբևէ քաղաքական գործընթացը չի կարող զենքով իրականացվել, և ճնշումներն ազդեցություն ունենան. «Ցանկությունը ժողովրդի, մարդու մեջ արտահայտվում է ներքին ձայնի շնորհիվ, թե ում է տալու իր ձայնը»:
Մանրամասները՝ տեսանյութում:
