Թուրքական Milliyet թերթի փոխանցմամբ՝ Թուրքիայի էկոնոմիկայի նախարար Նիհաթ Զեյբեքջին Անթալիայում անցկացված Թուրքիա-Ռուսաստան մեդիա ֆորումում գոհունակություն է հայտնել, որ 7-8 ամիս անց հաջողվեց կարգավորել երկու երկրների հարաբերությունները, որոնց վատթարացումը վնասել է երկու երկրներին էլ:
Զեյբեքջիի խոսքով՝ զբոսաշրջության ոլորտում Ռուսաստանի պարագայում անկումը կազմել է 70 տոկոս, իսկ դեպի Ռուսաստան արտահանման ծավալը նվազել է 38 տոկոսով. «Այսպիսի իրավիճակում չկան հաղթողներ:
2015 թվականի նոյեմբերից առաջ երկու երկրների միջև ապրանքաշրջանառության ծավալը կազմել է 34 միլիարդ դոլար, մինչդեռ այսօր այն կազմում է 20 միլիարդ դոլար: Մենք նպատակադրվել ենք հաջորդ տարի այդ ցուցանիշը հասցնել 40 միլիարդ դոլարի, իսկ հետագայում՝ 100 միլիարդ դոլարի:
2015 թվականի նոյեմբերից առաջ վերացված էր վիզային ռեժիմը: Անհրաժեշտ է վերացնել առևտրի ոլորտում առկա արգելքները: Թուրքիան մինչ այժմ 70 միլիարդ դոլարի ներդրումներ է կատարել Ռուսաստանում:
Տեխնիկական աշխատանքներ են տարվում առևտուրը ռուսական ռուբլով ու թուրքական լիրայով իրականացնելու համար: Մենք ցանկանում ենք, որ Թուրքիա եկող Ռուսաստանի քաղաքացիները կարողանան կիրառել ռուբլի, իսկ Ռուսաստան մեկնող Թուրքիայի քաղաքացիները՝ լիրա: 100 միլիարդ դոլարի ցուցանիշին պետք է հասնենք հենց դրանով»:
