Նախորդ տարվա համեմատ հայաստանյան և մասնավորապես երևանյան հասարակության հետաքրքրության աճը ղարաբաղյան հանգստի գոտիների հանդեպ մեծացել է: Երևանցիները, բացի ՀՀ գեղատեսիլ վայրերում հանգստանալուց, նախընտրում են վայելել Ղարաբաղը: Լեռնային Ղարաբաղում հանգստանալու համար անհրաժեշտ է գրեթե նույնքան գումար, որքան պահանջվում է Ծաղկաձորի, Դիլիջանի, Ջերմուկի հանգստյան տներում հանգիստը վայելելու համար: Եթե չհաշվենք ճանապարհածախսը, ապա կարող ենք նույնիսկ ասել, որ Ղարաբաղում հանգիստ կազմակերպելն ավելի էժան է, քան Հայաստանում: Այս մասին այսօր «Առաջին լրատվական»-ի հետ զրույցում ասաց ներգնա տուրիզմի մասնագետ Նատալյա Թերիխանյանը:
Նա նշեց, որ Ղարաբաղում հանգստի դեպքում գիշերակացը կազմակերպվում է Ստեփանակերտ կամ Շուշի քաղաքներում, որովհետև հյուրանոցների մեծ մասը տեղակայված է այդ քաղաքներում, թեև հանգստացողները զբոսաշրջային փաթեթներ են վերցնում դեպի Գանձասար, Տիգրանակերտ, Շուշի և այլ վայրեր:
«Մեկ օր Ղարաբաղում հանգստանալու և գեղատեսիլ վայրերը վայելելու համար մեկ անձին անհրաժեշտ է 20-30 հազար դրամ՝ ներառյալ սնունդը, հյուրանոցի գինն ու էքսկուրսիան: Ինչ վերաբերում է տրանսպորտային ծախսերին, ապա եթե խմբակային հայտեր չեն լինում, այսինքն՝ 15-ից ավելի անձ, իրենք են կազմակերպում իրենց տեղափոխումը հասարակական տրանսպորտի միջոցով, իսկ դա կազմում է 10 հազար դրամ՝ մեկ ուղղությունը»,- ասաց ներգնա տուրիզմի մասնագետը: Վերջինս նշեց, որ դիմում են հիմնականում երեք գիշեր փաթեթների համար, որը միջինը կազմում է 70-80 հազար դրամ՝ կախված հյուրանոցի դասից:
Ներկայացնենք Ղարաբաղում գտնվող մի քանի հյուրանոցների գները, որոնք զբոսաշրջիկների են ընդունում այս ամռան տապին: Ստեփանակերտ քաղաքի «Արմենիա» հյուրանոցում ապրիլի 16-ից հոկտեմբերի 15-ն ընկած ժամանակահատվածում ցանկացողները կարող են հանգստանալ օրական 29 հազար դրամից մինչև 100 հազար դրամի սահմաններում: Մեկ հոգու համար նախատեսված սենյակներն արժեն 29 և 33 հազար դրամ: Երկու մարդու համար նախատեսված սենյակն արժե 35 հազար դրամ, ընտանիքի համար նախատեսված սենյակը՝ 43 հազար դրամ: «Արմենիա»-ն չորսաստղանի հյուրանոց է և համապատասխանում է չորսաստղանի հյուրանոցների միջազգային չափանիշներին:
Այս սեզոնին Ստեփանակերտի «Նաիրի» հյուրանոցում կարելի է հանգստանալ և ժամանակ անցկացնել՝ սկսած օրական 16 հազար դրամից: Երկու հոգու համար նախատեսված սենյակն արժե 24 հազար դրամ:
Ստեփանակերտի Թումանյան փողոցում տեղակայված «Երևան» հյուրանոցում մեկ անձը կարող է հանգստանալ օրական 16 հազար դրամով: Այստեղ երկու անձը կարող է հանգստանալ 24 հազար դրամով, իսկ ընտանիքը՝ 36 հազար դրամով:
Ստեփանակերտի Գյուրջյան փողոցում տեղակայված «Ավետիս» հյուրանոցում ևս կարելի է հանգստանալ ամառային երևանյան տապից պատսպարվելու նպատակով: Այստեղ մեկ հոգին կարող է հանգստանալ՝ օրական վճարելով 14 հազար դրամ: Երկտեղանոց սենյակն այս հյուրանոցում արժե 18 հազար դրամ: Բնականաբար, այս հյուրանոցում ավելի հարմարավետ պայմաններ նախընտրողները ևս կգտնեն իրենց նախասիրություններին համապատասխան սենյակներ ավելի թանկ գներով:
Ստեփանակերտի Ազատամարտիկների փողոցի վրա գտնվող «Եվրոպա» հյուրանոցը ևս առաջարկում է հարմարավետ պայմաններ: Այստեղ մեկ անձը կարող է հանգստանալ՝ օրական վճարելով 25 հազար դրամ, իսկ երկու անձը՝ 35 հազար դրամ: Կան նաև թանկ տարբերակներ:
Հյուրանոցային համալիրներ կան նաև այլ քաղաքներում, որոնց գնային քաղաքականությունը էականորեն չի տարբերվում Ստեփանակերտում տեղակայված հյուրանոցների առաջարկած գներից:
