ՀՀ-ում այսօրվա դրությամբ կայուն վթարայնության վիճակ է, որի արդյունքում նախորդ տարվա համեմատ ճանապարհատրանսպորտային պատահարների (ՃՏՊ) հետևանքով վթարների և զոհերի թիվն առաջին անգամ հանրապետությունում նվազել է. այս մասին այսօր հրավիրված ասուլիսին հայտարարեց Ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:
«Վիճակը կարելի է բավարար գնահատել: Տարեցտարի աճող տենդենցի պայմաններում, ընդհակառակը, պատկերը փոխվել է: Այսօրվա դրությամբ՝ տարեսկզբից ՀՀ-ում արձանագրվել է 1972 ՃՏՊ, զոհերի թիվը 150-ն է, իսկ վիրավորվել է 2794 մարդ։ Նախորդ տարվա նույն ժամանակահատվածի համեմատ պատահարների քանակը նվազել է 174-ով, զոհերի թիվը 53-ով է կրճատվել, իսկ վիրավորների թիվը՝ 253-ով: Առաջին անգամ աճի տենդենցը կանգնել է, և ոչ թե 53, այլ 80 մարդու կյանք է փրկվել այս տարվա 8 ամիսների ընթացքում»,- նշեց Ն. Սարգսյանը:
Նոր ուսումնական տարվա մեկնարկի կապակցությամբ հայտարարվել է անվտանգ երթևեկության միամսյակ և այդ ուղղությամբ ոստիկանության կողմից աշխատանքներ են իրականացվել: Սեպտեմբերի 1-ից սկսած ոստիկանական կարգախմբերը պարեկություն կանեն հանրապետության բոլոր այն դպրոցների մոտ, որոնք գտնվում են ավտոճանապարհների հարևանությամբ,- վստահեցրեց Նորիկ Սարգսյանը:
Անվտանգության ապահովումը, ըստ Ն. Սարգսյանի, միայն ոստիկանությունից չի կախված այլ նաև երեխաների, ծնողներից. «Լուրջ քարոզչություն պետք է իրականացնել, որպեսզի համատեղ ուժերով միամսյակը ամփոփենք բոլորիս համար ցանկալի արդյունքով»:
Մանրամասները՝ տեսանյութում:
Լուսանկարը՝ Photolure-ի
