Այսօր՝ հուլիսի 14-ին, Կոտայքի մարզի Պռոշյան համայնքում արտահերթ ընտրություններ են:
26/01 ընտրատեղամասում հանձնաժողովի նախագահ Աննա Կարապետյանն «Առաջին լրատվական»-ին տեղեկացրեց, որ մինչև 17.00-ի դրությամբ իր պարտականությունը կատարել է 1120 ընտրող: Նա դրական գնահատեց ընտրական գործընթացը՝ հավելելով, որ միայն առավոտյան է եղել ընտրողների մեծ հոսք: Ընտրական տեղամասում մեր գտնվելու պահին կուտակումներ չկային, ընտրողների հոսքը քիչ էր:
26/02 ընտրատեղամասում 1198 ընտրողից 17.05-ի դրությամբ իր ընտրական պարտքը կատարել էր 1240-ը: Այստեղ ևս վիճակը հանգիստ էր կուտակումներ չկային: Հանձնաժողովի նախագահ Արթուր Մկրտչյանը, հիմնվելով նախորդ տարիների փորձի վրա, մեզ տեղեկացրեց, որ մինչև երեկո ակնկալվում է ընտրողների թվի ավելացում։
Նշենք, որ Պռոշյանի գյուղապետի պաշտոնի համար պայքարում են երեք ինքնառաջադրված թեկնածուներ՝ Պռոշյան համայնքի ղեկավարի տեղակալ, ՀՅԴ անդամ Վովա Սահակյանը, ՀՀԿ անդամ Արթուր Մուրադյանը և անկուսակցական, «ՀՀ նախագծերի պետական արտագերատեսչական փորձաքննություն» ՓԲԸ–ի գլխավոր մասնագետ Ալեքսան Ալեքսանյանը:
Հիշեցնենք, որ Պռոշյանի նախկին գյուղապետ Հրաչ Մուրադյանն ապրիլի 2-ին գյուղապետարանի դիմաց սպանվել է հրազենից, իսկ Հովիտ գյուղի նախկին գյուղապետ Սամվել Պետրոսյանը փետրվարի 27-ին հանկարծամահ է եղել:
