WikiLeaks-ը պետական գաղտնի փաստաթղթեր հրապարակելու միջոցով ճշմարտության համար պայքարելու իր մարտական ձգտման մեջ խախտում է շատ անմեղ մարդկանց, այդ թվում՝ սեքսուալ բռնության զոհերի և հիվանդ երեխաների մասնավոր կյանքի իրավունքը: Այս մասին գրում է Associated Press-ը:
Միայն անցած տարի WikiLeaks-ը պետական փաստաթղթերի հետ հրապարակել է բժշկական փաստաթղթեր, որոնցում պարունակվում են շարքային քաղաքացիների անձնական տվյալները, ինչպես նաև տարբեր երկրների հասարակ բնակիչների ֆինանսական վիճակի և անձնագրային տվյալների մասին տեղեկությամբ փաստաթղթեր:
«Նրանք հրապարակել են ամեն ինչ՝ իմ հեռախոսահամարը, հասցեն, անունս և այլ տվյալներ»,- գործակալությանը պատմել է Սաուդյան Արաբիայի բնակիչը: Նրա խոսքով՝ հրապարակվել են նաև հայրության վերաբերյալ իր նախկին կնոջ հետ նրա վեճին վերաբերող փաստաթղթեր:
Associated Press-ը չի կարողացել ստանալ WikiLeaks-ի հիմնադիր Ջուլիան Ասանժի մեկնաբանությունը:
Միայն «սաուդյան դոսյեում» ընդգրկվել է առնվազն 124 բժշկական փաստաթուղթ, որոնցում տվյալներ են պարունակվում որոշ սովորական քաղաքացիների հոգեկան վիճակի մասին, տեղեկություն ծանր հիվանդ երեխաների բուժման ընթացքի մասին, նաև փախստականների անձնական տվյալներ:
ԱՄՆ Դեմոկրատական կուսակցության փաստաթղթերում պարունակվել են տասնյակ վարկային քարտերի և սոցիալական ապահովության քարտերի տվյալներ, հայտնում է Associated Press-ը: Երկու մարդ, որոնց տվյալները կազմակերպությունը հրապարակել է, գործակալությանը հայտնել են, որ տուժել են հանցագործների գործողություններից, որոնք օգտվել են հրապարակված տեղեկությունից:
