Ադրբեջանական Turan լրատվական գործակալության փոխանցմամբ՝ ադրբեջանցի հանրահայտ իրավապաշտպան Լեյլա Յունուսը նամակ է հղել կալանքի տակ պահվող՝ «Մուսուլմանական միասնություն» շարժման առաջնորդ Տալե Բագիրզադեին, որում իր աջակցությունն է հայտնել նրան:
«Սարսափելի է կարդալ այն կտտանքների մասին, որոնց ենթարկել են Ձեզ: Ես մշտապես կարծել եմ, որ մարդիկ չեն բաժանվում մուսուլմանների, քրիստոնյաների, հրեաների, աթեիստների, չեն բաժանվում ըստ ազգության՝ հայերի, ադրբեջանցիների, ռուսների ու գերմանացիների:
Կան մարդիկ և կան ոչ մարդիկ: Եթե մենք չաջակցենք միմյանց, այդ ոչ մարդիկ պարզապես կոչնչացնեն մեզ: Կարդալով Բաքվում ամենօրյա կալանավորումների մասին՝ հստակ հասկանում ես, որ հենց մարդկանց չհամախմբվածությունն է օգնում ոչ մարդկանց:
Հարգարժան Տալե, առաջիկա օրերին կսկսեմ «Ուրան» գործողությունը՝ այն նույն գործողությունը, որը մեկնարկել է 1942 թվականի նոյեմբերի 19-ին (Ստալինգրադի հարձակողական գործողություն): Ների՛ր, սակայն այլ կերպ հնարավոր չէ, բացատրել, թե ինչ եմ ծրագրում անել»:
