Ավելի քան 1 մլն մարդ Սիրիայում տարվա սկզբից ստացել է մարդասիրական օգնություն։ Այս մասին հայտնում է մարդասիրական հարցերի համակարգման ՄԱԿ-ի վարչությունը։
Համաձայն վարչության տվյալների՝ այս տարվա 8 ամիսներին Սիրիայում մարդասիրական օգնություն է ստացել 1.275.750 մարդ։ Նրանցից 817.100-ը բնակվում են դժվարհասանելի շրջաններում, 401.650-ը՝ պաշարված բնակավայրերում։ Ընդհանուր առմամբ Սիրիա է ուղարկվել 107 մարդասիրական շարասյուն, իրականացվել է օդով մարդասիրական օգնության 57 մատակարարում, 97 նետում մեծ բարձրությունից։
Օգոստոսին ՄԱԿ-ն ու գործընկերային կազմակերպությունները անցկացրել են մարդասիրական օգնության մատակարարման 37 գործողություն, բոլորը՝ Դեր-Զորում։ Մարդասիրական բոլոր կազմակերպություններն օգոստոսին սնունդ են հասցրել 10.1 տոկոս մարդու, ովքեր գտնվում են պաշարված բնակավայրերում։ Դա եռակի ավելի է, քան մայիսին (3,4%), սակայն քառակի քիչ, քան հուլիսին (37,9%).
Ավելի վաղ Սիրիայի հարցով ՄԱԿ-ի հատուկ պատվիրակ Ստաֆան դե Միստուրան լրագրողներին հայտարարել էր, որ 110 օրում Սիրիա չի ուղևորվել մարդասիրական օգնությամբ ոչ մի շարասյուն։
Անհրաժեշտ մթերքների մատակարարումը շարունակում է իրականացնել միայն Պարենամթերքի համաշխարհային կազմակերպությունը՝ պաշարված Դեր-Զոր բեռները նետելով ինքնաթիռներից։
Դրա հետ կապված՝ դե Միստուրան որոշում է ընդունել առաջին անգամ հինգշաբթի չանցկացնել Սիրիայում մարդասիրական հասանելիության թիրախային խմբի նիստ՝ ի նշան խորը անհանգստության։
