«Առաջին լրատվական»-ի տեղեկություններով՝ օրերս ԱԺ պատգամավոր, նախկին ԲՀԿ-ական Վահան Բաբայանն իր սակավաթիվ համակիրներով՝ մեկ-երկու հոգով, պաստառներով գնացել են Գագիկ Ծառուկյանի առանձնատան մոտ, որպեսզի ակցիա իրականացնեն և Ծառուկյանից պահանջեն վերադառնալ քաղաքականություն։ Սակայն ակցիան, ըստ էության, չի կայացել, քանի որ դրա համար շատ քիչ մարդ է եղել և բացարձակապես ոչ մի լրատվամիջոց, որոնց միջոցով հնարավոր կլիներ ի լուր աշխարհի դարձնել այդ «ողջյունելի» նախաձեռնությունը։
Վահան Բաբայանը սակայն, ինչպես և սպասվում էր, մեզ հետ զրույցում հերքեց տեղեկությունը։ «Դա բացարձակ ապատեղեկատվություն է, ուրիշ բան չունեմ ասելու»,- ասաց նա։
Մեր դիտարկմանը, թե հաշվի առնելով այն հանգամանքը, թե ինչ ճանապարհով քաղաքականությունից հեռացվեց Ծառուկյանը, Բաբայանը տեսնո՞ւմ է նրա վերադարձի հավանականությունը և հնարավորությունը, կամ արդյո՞ք այդպիսով փորձ է անում իր համար կրկին քաղաքական տանիք փնտրել, արձագանքեց. «Ես կարծում եմ, որ պարոն Ծառուկյանն իր հայտարարություններն արել և անում է անձամբ։ Ես չեմ, որ պետք է մեկնաբանեմ կամ կարծիքներ հայտնեմ նրա վերադարձի հետ կապված։ Ինքը մեծ արժանիքներ ունեցող քաղաքական, հասարակական, բարեգործական, տարբեր ոլորտներ ներկայացնող գործիչ է։ Նաև իր շնորհիվ է, որ այսօր մենք ունեցանք օլիմպիական մեդալներ։ Ինչ վերաբերում է ձեր ասածին, կրկնում եմ, դա ապատեղեկատվություն է։ Այսքանը»,- ասաց Վահան Բաբայանը։
Լուսանկարը՝ Photolure-ի
