Նյու Յորք նահանգում բնակվող դպրոցականի ընտանիքը դատի է տվել կրթական հաստատության ղեկավարությանը, որը դեռահասին անարդարացիորեն մեղադրել է ահաբեկիչների հետ կապեր ունենալու մեջ և ուժով նրան ստիպել է ստորագրել «խոստովանությունը», որի համաձայն նա իբր հավատարմության երդում է տվել ԴԱԻՇ ահաբեկչական խմբավորմանը: Այդ մասին հայտնում է Reuters-ը:
Գործակալության տվյալներով` դեպքը տեղի է ունեցել Իսթ-Այլենդ քաղաքի դպրոցներից մեկում ԱՄՆ-ի իսլամ դավանող 12-ամյա քաղաքացի Նաշվան Ուպալի հետ, որի ընտանիքը ԱՄՆ է տեղափոխվել Պակիստանից: Ինչպես նշվում է, դեռահասը ունի մտավոր խնդիրներ, որի պատճառով էլ նրան հաճախ վիրավորում են հասակակիցները:
Այսպես, մի քանի ամիս առաջ համադասարանցիների հարձակման ժամանակ նա դրական է պատասխանել այն հարցին, թե պատրաստվո՞ւմ է պայթեցնել ցանկապատը: Ընդ որում՝ ինչպես նշված է հայցում, տղան չի հասկացել թե իր հետ ինչի մասին են խոսում: Դրանից հետո դպրոցի ղեկավարությունը նրան կանչել է և ուժով ստիպել ստորագրելու «խոստովանություն» այն մասին, որ նա երդում է տվել ԴԱԻՇ-ին, գիտի ռումբեր պատրաստել, տանը պահում է պայթուցիկներ և պատրաստվում է պայթեցնել դպրոցը:
Դրանից հետո տնօրենը ոստիկաններ է կանչել, որոնք դեռահասին տուն են ուղեկցել և այնտեղ ոչինչ չեն գտել: Ինչպես հայտնում է New York Post-ը՝ տղային միևնույն է 1 շաբաթ չեն թողել դպրոց «հանցավոր գործողությունների համար»:
Այդ կապակցությամբ դպրոցականի ընտանիքը հայց է ներկայացրել, պահանջելով 50 միլիոն դոլարի չափով բարոյական փոխհատուցում, հայտնում է Reuters-ը:
