Ինչպես հայտնի է, «Ժառանգություն»-ն այսօր հաղորդագրություն է տարածել առաջիկա ՏԻՄ ընտրություններին չմասնակցելու մասին:
Անդրադառնալով այս որոշման պատճառներին՝ «Ժառանգություն» խմբակցության պատգամավոր Զարուհի Փոստանջյանը «Առաջին լրատվական»-ի հետ զրույցում ասաց. «Այս պայմաններում, երբ «Ժառանգության» անդամները գտնվում են բանտախցում, և հանրությունն ունի ռազմագերիներ, մենք այս ընտրությունները չենք դիտարկում որպես բացառիկ միջոց՝ հասնելու փոփոխությունների»:
Նրա խոսքով՝ այդ իսկ պատճառով իրենց պայքարը նրանք որոշել են ուղղել բանտախցում գտնվող իրենց գործընկերների և ռազմագերիների ազատագրմանը:
Ինչպես նշեց տիկին Փոստանջյանը՝ իրենց գերագույն նպատակը իրական փոփոխություններն են, որոնց հասնելու համար անհրաժեշտ է, որ նախ՝ ազատ արձակվեն իրենց գործընկերները, բոլոր քաղբանտարկյալները և ռազմագերիները:
Դիտարկմանը՝ ԳԱԼԱ-ն միայն լրագրողից է իմացել է ՏԻՄ ընտրություններին չմասնակցելու «Ժառանգության» որոշման մասին, Զարուհի Փոստանջյանը հակադարձեց. «Մենք ԳԱԼԱ-ի հետ ամուսնացած չէինք, որ նրանք մեզնից իմանային այդ մասին: ԳԱԼԱ-ն նոր ուժ է, նոր քաղաքական հայտ է ներկայացնում, և մենք իրենց մաղթում ենք բարի ճանապարհ»:
Բացի այդ, մեր զրուցակիցը տեղեկացրեց, որ իրենք մոտ երկուսուկես ամիս առաջ իրենց տեղական կառույցների ժողովներում կայացրել էին որոշում Գյումրիում, Վանաձորում, Սիսիանում և Կապանում ընտրություններին առանձին մասնակցելու մասին. «Նրանք դեռ այդ ժամանակ նույնիսկ գրանցված չէին, հետևաբար մենք խնդիր չունենք որևէ մեկի հետ»:
Մանրամասները՝ տեսանյութում:
