Սան Ֆրանցիսկոյի միջազգային օդանավակայանն ընդունել է նոր՝ եղջյուրավոր «աշխատակիցների», որոնք «կարգավորում» են օդանավակայանի արևմտյան հատվածում աճող խոտը՝ հրդեհի հավանականությունը նվազեցնելու համար: Այս մասին հաղորդում է Discovery News-ը:
Ալիսա, Կուկի և Միսթր Ֆազի այծերն՝ իրենց 400 ցեղակիցների հետ, ակամա դարձել են հրդեհի դեմ պայքարող մարտիկներ: Նրանք զբաղվում են իրենց համար սովորական գործով՝ ուտում են՝ դրանով հանդերձ պաշտպանելով օդանավակայանը և մերձակայքում գտնվող տները հրդեհներից:
Հոտը տրամադրել է մի կալիֆոռնիական ընկերություն, որի անվանումը կարելի է թարգմանել հետևյալ կերպ՝ «Մենք բոլորս էլ ինչ-որ չափով այծեր ենք»:
Հավելենք, որ այս փորձը կիրառվել է նաև Չիկագոյի օդանավակայանում:
