Մոտ մեկ ամիս առաջ Հանրապետական մարզադաշտի առջև շաբաթ և կիրակի օրերին գործող «Քրջի բազարում» հագուստ և բազմազան հին իրեր վաճառող մարդկանց հեռացրել են տարածքից՝ նրանց տրամադրելով Վերնիսաժի հարակից տարածքը՝ Կառավարության 3-րդ մասնաշենքի դիմաց: Այն մարդիկ, ովքեր մետաղյա իրեր են վաճառում, կկանգնեն Վերնիսաժում:
«Քրջի բազարում» իրեր վաճառողներն այսօր հավաքվել և պահանջում էին հաստատել իրենց տեղը և թողնել, որպեսզի աշխատեն իրենց հին տեղում: Ակցիայի մասնակիցներն ասացին, որ ի սկզբանե իրենց հատկացված տեղից՝ Կառավարության 3-րդ մասնաշենքի առջևից նախկին քաղաքապետ Կարեն Կարապետյանը տեղափոխել է Հանրապետական մարզադաշտի դիմաց՝ պատճառաբանելով, որ տարածքը հին իրեր վաճառելու համար այնքան էլ հարմար չէ:
Ակցիային ներկա Առևտրի և սպասարկման վարչության ներկայացուցիչը մի քանի րոպե լսեց մարդկանց բողոքը, հետո պատճառաբանեց, որ ժամանակ չունի և հեռացավ:
Ներկա էին նաև «Բարև Երևան» խմբակցության ղեկավար Անահիտ Բախշյանը և ավագանու անդամ Դավիթ Սանասարյանը, ովքեր զրուցեցին ներկաների հետ, խոստացան, որ հարցն անպայման կբարձրացնեն քաղաքապետի առաջ և կփորձեն օգնել: Անահիտ Բախշյանը կտրուկ դեմ է տվյալ տարածքում «Քրջի բազարը» վերաբացելուն, իսկ Դավիթ Սանասարյանը դրան հավելեց, որ անհրաժեշտ է այդ մարդկանց տաղավարներով տարածք տալ, որպեսզի անկախ եղանակային պայմաններից՝ կարողանան վաճառել իրենց ապրանքը:
Նշենք, որ Հանրապետական մարզադաշտի դիմաց իրենց ապրանքը վաճառելու համար մարդիկ տեղի վարձ չէին մուծում, իսկ հիմա 1 ք/մ-ի համար վճարելու են 200 դրամ:
