BBC-ի փոխանցմամբ՝ Կոսովոյի ինքնահռչակ հանրապետության ոստիկանությունը հրապարակել է առաջարկություն, ըստ որի՝ իրենք խոստանում են 10 հազար եվրո պարգևավճար հինգշաբթի Պրիշտինայում խորհրդարանի շենքը գրոհած անհայտ անձանց մասին տեղեկության դիմաց: Տեղեկության հաղորդման համար տրամադրվել է թեժ գծի հեռախոսահամար:
Հանրապետության ՆԳՆ-ն հաղորդել է, որ հինգշաբթի օրը, ժամը մոտավորապես 23.05-ին (Երևանի ժամանակով՝ ուրբաթ, ժամը 01.05-ին), Պրիշտինայում Ագիմ Ռամադանիի փողոցից գրոհել են խորհրդարանը պայթուցիկ սարքի օգնությամբ: Ինչպես հայտնում է ոստիկանությունը՝ շենքը վնասվել է, նյութական վնաս է հասցվել նաև մոտակայքում կայանած ավտոմեքենաներին, սակայն տուժածներ չկան։
«Ոստիկանությունը աշխատում է բոլոր տվյալների և հանցանշանների հավաքման ու վերլուծության ուղղությամբ, որպեսզի բացահայտի գործը և մեղավորներին որքան հնարավոր է՝ արագ հանձնի արդարադատությանը: Ուստի ոստիկանությունը օգնություն է խնդրում քաղաքացիներից կամ նրանցից, ովքեր կարող են այդ գործի հետ կապված օգտակար տեղեկատվություն տրամադրել»,- ասված է ոստիկանության հաղորդագրությունում:
