Արմավիրի մարզի ընդհանուր իրավասության դատարանի Էջմիածնի նստավայրում Հրաչիկ Սարգսյանի նախագահությամբ ընթանում է Մարատ Սարգսյանի գործի դատավարությունը:
Էջմիածին քաղաքի բնակիչ, 33-ամյա Մարատ Սարգսյանը, ըստ առաջադրված մեղադրանքի, 2012 թվականի մայիսի 27-ին, ժամը 15-ի սահմաններում Էջմիածնի Մաշտոցի փողոցում, իր անձնական օգտագործման «Նիսան Մարչ» մակնիշի ավտոմեքենայի մեջ ֆինանսական հարցերի շուրջ վիճաբանել է տարադրամի փոխանակում իրականացնող Մայիս Խաչիկյանի հետ:
Վիճաբանության ընթացքում սպանության դիտավորությամբ Մարատ Սարգսյանը իր մոտ եղած դանակով բազմաթիվ հարվածներ է հասցրել Խաչիկյանին ու սպանել:
Այնուհետև Մարատ Սարգսյանը Խաչիկյանի աջ գոտկային հատվածից՝ վերնաշապկի տակից հանել ու գողացել է պոլիէթիլենային տոպրակի մեջ գտնվող 14 հազար դոլար գումարը:
Մայիս Խաչիկյանի դին Սարգսյանն իր մեքենայով տեղափոխել ու գցել է Արմավիրի մարզի Գայ ու Չոբանքարա համայնքների տարածքով անցնող չգործող ջրատարը:
Մարատ Սարգսյանին մեղադրանք է առաջադրվել դիտավորյալ սպանության և գողության համար՝ ՀՀ քրեական օրենսգրքի 104 հոդվածի 1-ին և 177 հոդվածի 3-րդ մասի 1-ին կետով:
Լուսանկարում պատկերված անձը նյութի հետ առնչություն չունի:
