Հանրապետական կուսակցությունից ԱՄՆ նախագահի թեկնածու Դոնալդ Թրամփը ԿՀՎ նախկին ղեկավար Մայքլ Մորելին մեղադրել է այն բանում, որ նա գործել է Սպիտակ տան հրամանով, երբ իրեն անվանել է «Ռուսաստանի ակամա գործակալ»,- հայտնում է Rosbalt-ը:
«Քլինթոնի տնային սերվերը, որի մասին նա ստել է ամերիկացիներին, եղել է մեծ ռիսկ ազգային անվտանգության համար, այնպես որ զարմանալի չէ, որ նրա քարոզարշավը առաջ է քաշում Օբամա-Քլինթոնի ևս մեկ խամաճիկի, ոչ անկախ մարդու, որպեսզի նա փորձի փոխել խոսակցության թեման»,- ասված է Facebook-ում տեղադրված Թրամփի հայտարարությունում: Գործարարը նկատի է ունեցել Քլինթոնի պետքարտուղար եղած ժամանակ նրա էլեկտրոնային նամակագրության շուրջ սկանդալը, որոնք նա պահել է մասնավոր սերվերում` խոցելի դարձնելով ցանցահենների համար:
ԱՄՆ կենտրոնական հետախուզական վարչության նախկին ղեկավար Մայքլ Մորելը New York Times-ի հոդվածում գրել էր, որ «պարոն Պուտինը միստր Թրամփին դարձրել է Ռուսաստանի Դաշնության ակամա գործակալ»: Նրա կարծիքով` Թրամփը սպառնալիք է ներկայացնում ԱՄՆ ազգային անվտանգության համար: Մորելը նաև հայտարարել է, որ ԱՄՆ նախագահական ընտրություններում աջակցում է երկրի նախկին պետքարտուղար Հիլարի Քլինթոնին:
