Բոլիվիայի նախագահ Էվո Մորալեսի ինքնաթիռի՝ Վիեննայում հարկադիր վայրէջքից հետո երկիրը կասկածի տակ է դնում միջազգային համաձայնագրերի արդյունավետությունը: Այս մասին հայտարարել է հարավամերիկյան հանրապետության արտգործնախարար Դավիդ Չոկեուանկան՝ փոխանցում է ITAR-TASS-ը:
«Հավանաբար եկել է ժամանակը, որպեսզի մենք սկսենք վերանայել միջազգային համաձայնագրերը»,- ասել է Բոլիվիայի արտաքին քաղաքական գերատեսչության ղեկավարը՝ հավելելով, որ իր երկիրը պետք է գլխավորի այդ քննարկումները:
Նրա խոսքով՝ կապիտալիզմն առաջացրել է ոչ միայն սննդամթերքի, էներգետիկ և ֆինանսական, այլև իշխանության ինստիտուտների ճգնաժամ:
Անցած շաբաթ մի շարք եվրոպական երկրներ փակել էին իրենց օդային տարածքը Մորալեսի ինքնաթիռի համար, որը թռիչքի էր դուրս եկել Մոսկվայից՝ հուլիսի 2-ի երեկոյան: Նման գործողությունների պատճառը կասկածներն էին, թե օդանավում կարող էր լինել ամերիկյան հատուկ ծառայությունների նախկին աշխատակից Էդվարդ Սնոուդենը: Դրանից հետո օդանավն ուղարկվել էր Ավստրիա, որից հետո Մորալեսն այնտեղ անցկացրել էր ավելի քան 13 ժամ:
Բոլիվիան և Լատինական Ամերիկայի այլ երկրներ դատապարտել էին այդ միջադեպը՝ այն գնահատելով որպես մահափորձ Մորալեսի կյանքի նկատմամբ և միջազգային համաձայնագրերի կոպիտ խախտում: