«Իրադարձությունները, որոնք այսօր ծավալվում են փողոցում, նմանատիպ են Հայաստանյան մյուս հանրահավաքներին, երբ մշտապես հարց է բարձրացվում, թե պետք է արդյոք լիդեր, թե ոչ, պետք է հասարակությունը ինքնաբուխ կազմակերպվի, շարժումները պետք է ապակենտրոնացված լինեն և այլն»,- «Առաջին լրատվական»-ի հետ զրույցում ասաց քաղաքական վերլուծաբան Լևոն Մարգարյանը։ Նրա խոսքերով՝ այսօր ըմբոստություն, ընդվզում կա, բայց երբ տեսնում ենք, թե ինչպես է այն կոորդինացվում, ապա տեսնում ենք, որ բնավ էլ ինքնաբուխ չէ հավաքը։ «Ամեն րոպե հնարավոր է հարթակից որոշումներ ընդունվեն, որոնք ընդունվում են կոնկրետ մարդկանց կողմից։ Կոնկրետ անձինք հղում անելով հասարակության վրա, փորձում են լղոզել պատասխանատվությունը։ Եվ քանի որ իշխանությունը բիրտ է, ապա միշտ էլ ցանկացած վատ, անցանկալի վերջաբանի դեպքում կարելի է ասել, որ իշխանությունը դիմել է բիրտ ուժի։ Բայց այդ պահվածքը խոսում է այն մասին, որ շարժումը կազմակերպման հետ խնդիր ունի»,- ասաց Մարգարյանը։
Նրա խոսքերով՝ այդ պահվածքի վառ ապացույցը նաև նախօրեին տեղի ունեցածն էր, երբ որոշում կայացվեց գնալ Սարի թաղ, բայց հետո հարթակի կանգնած անձինք ասացին, որ ժողովուրդն էր այդպես որոշել։ Մինչդեռ, երբ նայում ենք կադրերը հստակ երևում է, որ դրա հետ կապված որոշում է կայացվել։ «Հարթակին կանգնած անձինք կազմակերպչական լուրջ խնդիրներ ունեն։ Նրանք հաճախ «փնթի» որոշումներ են կայացնում, որոնց հետևանքները շատ լուրջ են լինում։ Պետք է ճիշտ հաշվարկներ կատարել, թե ասենք ոստիկանների հետ բախումը ինչ կտա, կամ հանրահավաքը կոնկերտ ուղղությամբ տանելը ինչ կտա»,- ասաց Մարգարյանը։
Վերջինիս դիտարկմամբ՝ հարթակի ղեկավարների խնդիր մենք միշտ ենք ունենում։ Այդպիսի խնդիր կար Բաղրամյանում, կա այսօր, դրա համար էլ մենք հաճախ տեսնում ենք, որ հարթակը զբաղեցնելու փորձ են անում տարբեր քաղաքական ուժեր, որոնց էլ հանրահավաքի մասնակիցներն են հեռացնում։ «Մենք լուրջ քաղաքական առաջնորդների խնդիր ունենք, քաղաքական մշակույթի ձևավորման խնդիր։ Նիկոլ Փաշինյանը, ով ունի բավական հարուստ քաղաքական կենսագրություն, նույնիսկ նրա ներկայությունը հարթակում ոչ միանշանակ ընդունվեց։ Պատճառը այն էր, որ սա ավելի շատ սոցիալական դժգոհություն է»,- նկատեց քաղաքագետը։
Առավել մանրամասն՝ տեսանյութում։
