«Լուսավոր Հայաստան» կուսակցության խորհրդի անդամներ Հայկ Կոնջորյանը և Դավիթ Խաժակյանն «Առաջին լրատվական»- ի հետ զրույցում ներկայացրին Հայաստանում վերջին օրերին ստեղծված աննախադեպ իրավիճակի վերաբերյալ իրենց դիտարկումները:
ԱԱԾ-ն հունիսի 30-ին հայտարարություն տարածեց, որում մասնավորապես նշված է, որ «Սասնա ծռեր» զինված խմբի անդամներին զենքը վայր դնելու և առանց դիմադրության իշխանություններին հանձվելու համար ժամանակ է տրվում մինչև ժամը 17.00-ն: Հակառակ դեպքում իրավապահ մարմինների հատուկ նշանակության ստորաբաժանումները լիազորված են առանց նախազգուշացման կրակ բացել և վնասազերծել ՊՊԾ գնդի տարածքում կամ դրանից դուրս գտնվող ցանկացած զինված անձի:
Նույն օրը հայտարարություն էր տարածվել նաև Ժիրայր Սեֆիլյանի կողմից, որում մասնավորապես նշված էր. «Ես նախ պետք է հանդիպեմ տղաներին, որից հետո միայն հանդիպեմ Սերժ Սարգսյանի հետ, որի արդյունքում միայն տղաները կարող են զենքը վայր դնել: Ես շարունակում եմ պնդել իմ այս դիրքորոշումը…»:
«Այս վերջնագրերը խոսում են այն մասին, որ բանակցությունների միջոցով խնդիրի կարգավորման, հանգուցալուծման ճանապարհները կա՛մ չեն գտնվել, կա՛մ մտել են փակուղի, վերջնագրային լեզուն խոսում է պատային, փակուղային վիճակի մասին, մանավանդ նախօրեի աննախադեպ բռնություններից հետո»՝ անդրադառնալով այդ հայտարարություններին՝ ասաց Հայկ Կոնջորյանը: Նա նաև հավելեց, որ ամեն րոպե կարող են տեղի ունենալ արտակարգ իրադարձություններ:
Հայկ Կոնջորյանի հավաստմամբ՝ «Լուսավոր Հայաստան» կուսակցության դիրքորոշումն այն է, որ չպետք է սպառված համարել կողմերի միջև բանակցությունները նոր հուն տեղափոխելու հնարավորությունը. «Արյունահեղությունից խուսափելու համար բանակցություններում պետք է ներգրավել Ժ. Սեֆիլյանին»:
Նրա խոսքով՝ իշխանության կողմից բռնության կիրառումը, ըստ էության, սպառում է վստահության մթնոլորտը:
Դավիթ Խաժակյանի դիտարկմամբ՝ բանակցային գործընթացը փակուղի մտավ, որովհետև իշխանությունների կողմից այլևս չդրսևորվեց կամք՝ իրավիճակը հանդարտ հանգուցալուծման տանելու համար:
«Ոստիկանները բիրտ, անհամաչափ ուժ կիրառելով՝ ավելի են լարում իրավիճակը: Ոստիկանությունը փաստի առաջ կանգնեցրեց իշխանությանը. ժողովրդի և իշխանության միջև նոր անջրպետ առաջացավ»,- ընդգծեց Դավիթ Խաժակյանը:
Հայկ Կոնջորյանի կարծիքով՝ կասկածներ են հարուցում ԱԱԾ-ի տարածած տեսանյութերը և հաղորդագրությունները. «Մանիպուլիատիվ գործիքների և քարոզչական տեսանյութերի շնորհիվ իրականությունը խեղաթյուրվում է, բայց իշխանությունը հաշվի չի առնում, որ երբ որ ուղիղ եթերում քաղաքացիները հետևում են իրադարձություններին, հնարավոր չի լինում այլ կերպ մատուցել ինֆորմացիան»:
«Սա արդյունք է այն բանի, որ տարիներ շարունակ խորացվել է հասարակության բևեռվածությունը, խորացվել է անարդարության զգացումը, գոյություն չունի վստահություն պետական ինստիտուտների և ժողովրդավարական ճանապարհով իշխանափոխության հասնելու նկատմամբ: Քաղաքացիները երբ որ հասկանում են, որ այլևս անհնար է իրենց քաղաքացիական իրավունքներն իրացնել ժողովրդավարական, սահմանադրական տրամաբանության մեջ, հայտնվում են մարդիկ, ովքեր, որպես վերջին միջոց, ընտրում են զինված ապստամբության դիմելը: Սա կարևորագույն քննություն է մեր ժողովրդի համար: Մենք մտնելու ենք ընտրական գործընթցի մեջ՝ ունենալով բևեռացված և սթրեսի ենթարկված հասարակություն»,- նշեց Հայկ Կոնջորյանը:
Նրա դիտարկմամբ՝ այս ճգնաժամի հաղթահարման համար հարկավոր է նոր քաղաքական միտք, նոր դիսկուրս, նոր գաղափարներ, որպեսզի քաղաքական համակարգն առողջանա:
Մանրամասները՝ տեսանյութում:
