2016 թվականի հուլիսի 27-ին Ոստիկանության Շենգավիթի բաժին է բերման ենթարկվել Երևանի Խորենացի փողոցում կայացած հանրահավաքի մասնակիցներից Գյումրու լրագրողների «Ասպարեզ» ակումբի խորհրդի նախագահ Լևոն Բարսեղյանը։ Ավելի ուշ հարուցվել է քրեական գործ՝ սառը զենք կրելու կասկածանքով, և նա ձերբակալվել է։ Լևոն Բարսեղյանը ենթարկվել է դատաբժշկական փորձաքննության։ Նկատենք, որ Հայաստանի իշխանությունները միշտ էլ ընդդիմադիր շարժումների ու իրենց քննադատների հետ փոխհարաբերություններում նախընտրել են ընդդիմադիրների նկատմամբ ուժի կիրառումը, հալածանքներն ու շինծու քրեական հետապնդումները։ Այս կերպ նրանք փորձել են լռեցնել իրենց ուղղված կամայական քննադատություն ու իրենց համար անցանկալի քաղաքական զարգացում։
Մենք՝ ներքոստորագրյալներս, համոզված ենք, որ Լևոն Բարսեղյանի նկատմամբ հարուցված քրեական գործը շինծու է, իսկ իբրև սառը զենք որակված դանակի առկայության փաստը՝ ընդամենը նրա ակտիվ հասարակական գործունեության, ինչպես նաև Խորենացի փողոցում տեղի ունեցող հանրահավաքներին մասնակցելու, իսկ վերջին օրը նաև այն վարելու համար Լևոն Բարսեղյանին «պատժելու» պատրվակ է։ Փաստորեն, մեր գործընկերը իրավապահ մարմինների կամայական գործողությունների թիրախավորված զոհ է դարձել քաղաքացիական դիրքորոշման համար։
Հաշվի առնելով վերոնշյալը՝ պահանջում ենք.
– իրավապահ մարմիններից՝ անհապաղ կարճել հարուցված քրեական գործը և ազատ արձակել Լևոն Բարսեղյանին,
– Իրականացնել օբյեկտիվ քննություն և պատժել լրագրող Գևորգ Թոսունյանի նկատմամբ բռնություն կատարած ոստիկաններին:
Դիմում ենք նաև ՀՀ իշխանություններին, որոնք տարբեր ամբիոններից խոսում են Հայաստանում ժողովրդավարական արժենքերի և խոսքի ազատության մասին, կոչ անելով նրանց անհապաղ ձեռնարկել քայլեր, որպեսզի չխոչընդոտվեն մամուլի ներկայացուցիչների աշխատանքերը:
«Լրագրողների միավորում»,
«Մեդիա և իրավունք»
«Ազատ լրագրողների ասոցիացիա»
Հայտարարությունը բաց է բոլոր միացողների համար
