ՀՀ վարչապետ Հովիկ Աբրահամյանի գլխավորությամբ կառավարությունում հուլիսի 25-ին տեղի է ունեցել խորհրդակցություն՝ նվիրված հանրակրթության ոլորտի հիմնախնդիրներին և բարձրագույն մասնագիտական կրթության համակարգի բարեփոխումներին: Այս մասին տեղեկացրին ՀՀ կառավարության տեղեկատվության և հասարակայնության հետ կապերի վարչությունից:
2016թ. հուլիսի 7-ին տեղի ունեցած ՀՀ կառավարության նիստում վարչապետ Աբրահամյանը հանձնարարել էր ՀՀ կրթության և գիտության նախարարին՝ նախապատրաստել հանրակրթության հիմնախնդիրների և բարձրագույն մասնագիտական կրթության բարեփոխումների թեմայով խորհրդակցություններ և դրանցից բխող փոփոխությունների ժամանակացուցային առաջարկներ:
Վարչապետին զեկուցվել է, որ մասնագիտական քննարկումների և առաջարկների հիման վրա մշակվել է կրթության որակի, արդյունավետության բարձրացման և հասանելիության ապահովման վերաբերյալ համալիր փոփոխությունների փաթեթ: Ծավալվել է մտքերի փոխանակություն, որի ընթացքում քննարկվել են ներկայացված առաջարկությունները:
Ամփոփելով կառավարության ղեկավարը նշել է, որ կրթական համակարգի բարեփոխումները պահանջված են, պետք է ստեղծել մատչելի ու մրցունակ կրթական ծրագրեր և, ըստ անհրաժեշտության, վերանայել ոլորտը կարգավորող օրենսդրական դաշտը:
