ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Հայաստանի Հանրապետությունում Լիտվայի Հանրապետության նորանշանակ արտակարգ և լիազոր դեսպան Էրիկաս Պետրիկասին: Այս մասին «Առաջին լրատվական»-ին հայտնում են ՏԿՆ հասարակայնության հետ կապերի բաժնից:
Փոխվարչապետը շնորհավորել է դեսպանին` առաքելությունը ստանձնելու կապակցությամբ և հաջողություններ մաղթել հետագա աշխատանքում: Նա նշել է, որ Հայաստանը Լիտվայի հետ ավանդաբար բարեկամական հարաբերություններ ունի և մեծ նշանակություն է տալիս համագործակցության ընդլայնմանը:
Փոխվարչապետի խոսքով` ԵՄ անդամ Լիտվայի արձանագրած հաջողություններն ու փորձը, մասնավորապես` տարածքային զարգացման ոլորտում, հետաքրքիր և օգտակար կարող են լինել Հայաստանի համար: Նա նաև կարևորել է երկու երկրների միջև միջտարածաշրջանային մակարդակով համագործակցության զարգացումը:
Ա. Գևորգյանն անդրադարձել է նաև տեղական ինքնակառավարման ոլորտի բարեփոխումներին` նշելով, որ հիմքում տարածքների համաչափ զարգացումն է, և դրանց իրականացման հարցում Հայաստանն ակնկալում է նաև Եվրամիության ու անդամ երկրների աջակցությունը:
Դեսպանը վստահեցրել է, որ իր կողմից կանի հնարավորը` երկու երկրների միջև տարբեր ոլորտներում համագործակցության խորացմանը նպաստելու համար: Նա ընդգծեց երկկողմ տնտեսական հարաբերությունների զարգացման անհրաժեշտությունը` կարևորելով նաև միջտարածաշրջանային փոխգործակցությունը:
Անդրադառնալով Եվրամիությունում Լիտվայի նախագահությանը` դեսպանը նշել է, որ նախագահության ընթացքում մեծ նշանակություն է տրվելու Արևելյան գործընկերության շրջանակում համագործակցությանը, և Լիտվան այդ գործընկերության զարգացման ջատագովներից է:
Կողմերն անդրադարձել են նաև Հայաստանում իրականացվող ԵՄ ծրագրերին, մասնավորապես «Թվինինգ» ծրագրի ընթացքին: Փոխվարչապետը տեղեկություններ է ներկայացրել նաև Եվրախորհրդում Հայաստանի նախագահության ընթացքում իրականացված և իրականացվելիք միջոցառումների մասին:
