Դիտորդական խումբը 3 օրերի ընթացքում արձանագրել է, որ ինչպես Սարի թաղում, այնպես էլ Խորենացի փողոցում տեղի ունեցած բախումների արդյունքում բոլոր ձերբակալվածների մոտ առկա են մարմնական վնասվածքներ:
Դիտորդական խումբը հայտարարություն է տարածել, որում մասնավորապես ասված է. «Միաժամանակ ցանկանում ենք շեշտադրում կատարել այն հանգամանքի վրա, որ նշված անձանց մոտ առկա որոշ մարմնական վնասվածքներ և իրենց պնդումները ապացուցում են, որ նրանց նկատմամբ կիրառվել է վատ վերաբերմունք և նրանք խոշտանգվել են:
Բացի ձերբակալվածների պնդումները, Դիտորդական խումբը արձանագրել է, որ որոշ ձերբակալվածների մոտ առկա էր աչքերի տակ կապտուկներ և այտուցներ, որոնք դիմադրություն ցույց տալու հետևանքով չէր կարող անձանց մոտ առաջանալ: Խումբը եզրակացրել է, որ նշված կապտուկները դիմադրություն ցույց տալու արդյունք չեն, այլ ծեծի եւ խոշտանգման հետևանք, որովհետեւ տվյալ ՁՊՎ-ներում բոլոր մարմնական վնասվածքները գրանցված էին անխտիր, բացի իրենց կողմից նշված երեք անձանց մոտ արձանագրված աչքերի կապտուկներից և այտուցներից. Դիտորդական խումբը հուլիսի 21-ին արձանագրել է, որ Երևանի ՁՊՎ-ում պահվում էին 4 ձերբակալված անձիք` կապված ՊՊԾ գնդի գրավման եւ դրանից հետո հետևող գործողությունների շրջանակներում:
Նշված 4 անձանցից 2-ը ձերբակալվել էին, որպես ՊՊԾ գնդում գտնվողների աջակիցներ, 1-ը` Սարի Թաղի բախումների դեպքերի հետ կապված էր ձերբակալվել, իսկ վերջինը` հենց առաջին ձերբակալվածն էր Խորենացի փողոցում կատարված հանրահավաքի արդյունքում:
22.07.2016թ-ին Դիտորդական խումբը Երևանի ՁՊՎ այցելելով արձանագրել է, որ նախկին 4 ձերբակալվածներին ավելացել էին ևս 15 ձերբակալված անձիք արդեն Խորենացի փողոցում հուլիսի 20-ին եւ 21-ին հանրահավաքից հետո կատարված բախումների հետեւանքով: Հուլիսի 21-ին եւ 22-ին Դիտորդական խումբը թեժ գծին ահազանգեր էր ստացվում տարբեր իրավապաշտպան կազմակերպություններից եւ հարազատներից, ովքեր տեղեկություններ են փորձում ճշտել, կորած իրենց հարազատների վերաբերյալ:
Այսօր դիտորդական խումբը այցելություններ կատարելով ՀՀ ոստիկանության Արմավիրի ՄՎ Վաղարշապատի եւ ՀՀ ոստիկանության Արարատի ՄՎ Մասիսի ՁՊՎ-ներ արձանագրել է, որ նշված դեպքերի հետ կապված Վաղարշապատի ՁՊՎ-ում պահվում էին 7 ձերբակալված անձիք, իսկ Մասիսի ՁՊՎ-ում` 2 ձերբակալված անձիք: Հարազատների կողմից կորած համարվող Ա.Գ-ն հայտնաբերվել է Վաղարշապատի ՁՊՎ-ում :
Դիտորդական խումբը խոստանում է շարունակել իր առաքելությունը հնարավորինս շատ ՁՊՎ-ներ այցելելով, եւ բացահայտել մնացած ձերբակալվածների գտնվելու վայրերը»:
