Արտակարգ իրավիճակների նախարար Արմեն Երիցյանն այսօր լրագրողների հետ զրույցում ևս անդրադարձավ Վերահսկիչ պալատի տարեկան հաշվետվությանը և որոշակի պարզաբանումներ տվեց այդ կապակցությամբ:
Մասնավորեցնելով ՎՊ-ի ներկայացրած խախտումները՝ Ա. Երիցյանը նշեց, որ, օրինակ, Արագածոտնի մարզում տեղի ունեցած փոքրիկ հրդեհի կապակցությմաբ գյուղապետը գրավոր դիմում է գրել է, որ գյուղացին 25.000 դրամ չի կարող մուծել, բանավոր զգուշացրել ենք քաղաքացուն, և գործը կարճվել է. «Երկրորդը վարչական իրավախախտումներն են. երկու անձինք տուգանվել են 25 հազար դրամով»:
Արմեն Երիցյանը ՎՊ զեկույցի հետ մասամբ համաձայնեց, ապա անդրադարձավ նաև 33 օբյեկտների մասին խնդրին. «Դրանք պետք է տեխնիկական քննություն անցնեն՝ ըստ ՎՊ զեկույցի, դրանցից ութի գործերը վարչական վարույթում են, յոթ արձանագրած օբյեկտներ ընդհանրապես չկան, չորսը փակ վիճակում են գտնվում, երեքը արտադրական վտանգավոր օբյեկտներ չեն:
Մեկ անգամ ևս հավաստիացնեմ, որ ամեն ինչ նախարարության ուշադրության կենտրոնում է, եղել են աշխատակիցներ, որ պատժվել են, եղել են այնպիսիք, որ լավ աշխատանքի համար խրախուսվել են»:
Նախարարը նաև նշեց, որ իրենք սերտորեն համագործակցում են դատախազության հետ:
Հարցին՝ թալանվա՞ծ է արդյոք բյուջեն, Արմեն Երիցյանը պատասխանեց. «Բյուջեն չի կարող թալանվել, մեր ամենօրյա աշխատանքները գտնվում են վարչապետի ուշադրության կենտրոնում, չի կարող թալանված լինել»:
Նախարարից հետաքրքրվեցինք նաև, թե ճի՞շտ են արդյոք մամուլի այն հրապարակումները, որ ինքը ոսկեզօծ շուրջ 80 մեդալ ունի, ինչին ի պատասխան՝ ՕԵԿ-ական նախարարն ասաց. «Ես մի փոքր այլ ճաշակ ունեմ, նման բան չկա»:
Լուսանկարը՝ PanARMENIAN Photo-ի
