«Գրված էր, թե 76 միլիոն ծախսվել է իբր գիտության համար, բայց կոմիտեի նախագահի և մնացածի համար դուրսը բաղնիք սարքելու և այլ բաների համար են ծախսվել»,- այսօր լրագրողների հետ հանդիպմանն իր մտահոգությունը հայտնեց կենսաբանական գիտությունների դոկտոր պրոֆեսոր, ակադեմիկոս Սիներիկ Հայրապետյանը: Նրա կարծիքով՝ փորձագետը պետք է անկախ մարմին լիներ, գիտավարչական գործառույթով զբաղվողը՝ մեկ այլ մարմին:
«Եթե մենք կոմիտեին ասում ենք՝ և՛ փորձագիտություն անցկացրու, և՛ փողերը բաժանիր, և՛ հաշվետվություն ներկայացրու, որ անձն էլ լինի այնտեղ՝ լկտիություն կանի, մեկը՝ շատ, մեկը՝ քիչ»,- նկատեց ակադեմիկոսը:
Նա համոզված է, որ գիտավարչական համակարգը չի համապատասխանում շուկայական և նույնիսկ խորհրդային համակարգին: Ամբողջ աշխարհում փորձագետը մեկ մարմին է, վարչատնտեսական գործառույթ կատարողը՝ մեկ այլ մարմին:
«3.4 միլիարդ դրամ ծախսվել է առանց փորձագիտության: ֆինանսներ են բաշխվել գիտության ոլորտում Գիտության, այսպես կոչված, կոմիտեի կողմից: Ենթադրվում է, որ պիտի ստուգեին, թե դա ո՞ւր է գնացել: Ակադեմիան պետք է զբաղվի փորձագիտությամբ, Գիտության կոմիտեն, նախարարությունը զբաղվեն նրանց կողմից հստակեցված տեխնիկական քաղաքականությամբ՝ ոչ թե իրենք որոշեն, թե ում ինչքան գումար տան»,- ասաց Սիներիկ Հայրապետյանը:
Հոգեբանական գիտությունների թեկնածու Սամվել Խուդոյանն էլ կարծում է, որ վիճակը բնական գիտությունների ոլորտում շատ ավելի բարվոք է, քան հասարակական գիտությունների:
«Մեզ մոտ գիտություններ կան՝ իրավաբանություն, հոգեբանություն, հասարակագիտություն, որտեղ հազարավոր գիտությունների թեկնածուների մեջ երեք-չորս իսկական գիտնական չեք գտնի: Մնացածը կողոպտված, կեղծ գիտնականներ են, որոնք գրագողության կամ այլ ձևերով ստացել են դիպլոմներ, դոցենտի աստիճաններ: Այս ամեն ինչը վճարվում է, պատկերացրեք, հազարավոր մարդիկ կան, ովքեր գիտության հետ կապ չունեն, բայց գիտության կողմից ֆինանսավորվում են»,- ընդգծեց հոգեբանը:
Սամվել Խուդոյանն առաջարկում է մշակել կոնկրետ չափանիշներ, որով պիտի տարբերվեն գիտնականները: «Եթե էս մարդու մոտ կա գրագողություն, ո՞նց եք դուք պետական մրցանակ տալիս: Պետական մրցանակ է տրվում մեկին, որը ոչ մի ինքնուրույն աշխատանք չունի: Դիսերտացիաներ են բերում, որտեղ բացի սեփական ազգանունից՝ ոչինչ իրենցը չէ. ռուսերենից թարգմանել ու ներկայացնում են որպես դիսերտացիա»,- նշեց հոգեբանը:
Գիտությունների ազգային ակադեմիայի մաթեմատիկայի ինստիտուտի մաթեմատիկական գիտությունների դոկտոր Գրիգոր Բարսեղյանը ստացել է Կյուրիի անվան պարգև՝ մաթեմատիկայի բնագավառում դասական տեսություն ստեղծելու համար: Սիներիկ Հայրապետյանի կարծիքով՝ ցանկացած ազգ կհպարտանար դրանով, շատ Նոբելյան մրցանակակիրներ կան, որ նման բան չեն կարողացել անել: Բայց մաթեմատիկոսի թեման չի ֆինանսավորվել:
