Պատգամավոր Լևոն Մարտիրոսյանը և իրավապաշտպան Ավետիք Իշխանյանը քննարկում են Սահմանադրության կարևորությունը։ Այսօր հուլիսի 5-ն է՝ պետական տոն՝ Սահմանդրության օր։ Ավետիք Իշխանյանի համար, սակայն, հուլիսի 5-ը տոն չէ, քանի որ, նրա համոզմամբ, սահմանադրական 3 հանրաքվեներն էլ կեղծվել են:
Առաջինը 1995 թ-ին էր, որը քննություն էր նորանկախ Հայաստանի համար։ Այս հանրաքվեն անցավ կոպիտ խախտումներով և հիմք դրեց այն Հայաստանի, որից բոլորս դժգոհ ենք։ Հաջորդը 2005 թ-ի սահմանադրական հանրաքվեն էր, որը կատարվեց Ռոբերտ Քոչարյանի իշխանության օրոք՝ շարունակում է պատմել Իշխանյանը։ Ըստ նրա՝ խայտառակ հանրաքվե էր նաև 2015 թ-ին դեկտեմբերի 6-ին անցկացվածը, որը կրկին ընդունվեց խախտումներով և չարտահայտեց ժողովրդի կամքը: Երեք Սահմանադրություններն էլ պարտադրվել են քաղաքացիներին՝ ընդգծում է իրավապաշտպանը:
Իրավաբան, միջազգային իրավունքի մասնագետ Արա Ղազարյանն էլ շեշտում է՝ խնդիրն այն է, որ մինչ օրս հասարակությունը և իշխանությունները չեն ընկալում, որ չկա պետական իշխանություն, կա հանրային իշխանություն:
ԱԺ ՀՀԿ խմբակցության պատգամավոր Լևոն Մարտիրոսյանն ընդունում է՝ բազմաթիվ համաքաղաքացիներ Սահմանադրությունն իրենցը չեն համարում, և ՀՀ Սահմանադրության և հասարակության միջև խզվածություն է տեսնում: Միաժամանակ համաձայն չէ, որ իր կուսակցությունն է միայն մեղավոր, որ այսօր Սահմանադրությունը չի աշխատում։
Մանրամասները` տեսանյութում:
