Բնակչության ծերացումը և դրա հետ կապված ծախսերը Ռուսաստանի բյուջեի համար լուրջ սպառնալիք են ներկայացնում և 21-րդ դարի կեսերին կարող են հանգեցնել երկրի պետպարտքի խիստ աճի՝ կանխատեսում է Standard & Poors վարկանիշային գործակալությունը: Այս մասին հայտնում է BBC-ն:
Ըստ այդմ՝ 65 տարեկանից բարձր բնակչության մասնաբաժինը 2050 թվականին կաճի մինչև 21%՝ ներկայիս 13%-ի դիմաց: Այդ ժամանակաշրջանում զգալիորեն կկրճատվի աշխատունակ տարիքի բնակչության մասնաբաժինը: Աշխատող մարդկանց վրա ժողովրդագրական ծանրաբեռնվածությունը նկատելիորեն կաճի:
Ընդհանուր առմամբ Ռուսաստանի բնակչությունը այս հարյուրամյակի կեսերին կկրճատվի 10%-ով՝ մինչև 129 միլիոն մարդ՝ ենթադրում է S&P-ն:
Դա կհանգեցնի առողջապահական և կենսաթոշակային վճարումների զգալի աճի: Մինչև 2050 թվականը կենսաթոշակների հետ կապված պետական ծախսերը կաճեն ՀՆԱ-ի մինչև 19%-ը՝ ներկայիս 13%-ի դիմաց, եթե չանցկացվեն բարեփոխումներ:
S&P-ի կարծիքով՝ Ռուսաստանը պետք է կենսաթոշակային համակարգի բարեփոխումներ կատարի որքան հնարավոր է՝ շուտ: Գործակալության վերլուծաբանները Ռուսաստանին խորհուրդ են տալիս վերականգնել կուտակային կենսաթոշակային համակարգը, որը երկարաժամկետ հեռանկարում կլինի ավելի հավասարակշռված: 2014-ից այդ համակարգը Ռուսաստանում սառեցված է՝ բյուջեի վրա ծաանրաբեռնվածությունը նվազեցնելու նպատակով:
Նրանք աջակցում են նաև թոշակային տարիքի բարձրացմանը և սոցիալական վճարների ավելացմանը:
