ԱԺ անկախ պատգամավոր «Լուսավոր Հայաստան» կուսակցության խորհրդի նախագախ Էդմոն Մարուքյանը «Առաջին լրատվական»- ի հետ զրույցում նշեց, որ եթե ԸՕ-ում փոփոխությունների իրականացման համար անհրաժեշտ գումարները չկարողանան հայթայթել, որևէ մտահոգություն չկա ընտրատեղամասում՝ ընտրախախտումների հետ կապված:
«Պետք չէր մտնել տեղամասերի ընտրախախտումների դաշտ, մենք ընդդիմությանը միշտ կոչ ենք արել կենտրոնանալ տարածքային ցուցակների վրա, որովհետև տեղամասերում ընտրակեղծիքներ չեն լինելու և չեն էլ եղել նախորդ խորհրդարանական ընտրությունների ժամանակ, որովհետև դրա դեմն առնելու հնարավորություններն ընդդիմությունն արդեն ունի՝ վստահված անձերի ինստիտուտի միջոցով: Կեղծիքները, ադմինիստրատիվ ռեսուրսի կիրառումը, մարդկանց գումար բաժանելը, ճնշելը և այլն, լինում է հիմնականում տեղամասից դուրս: Հիմա սխալ հարցի վրա է կենտրոնացում եղել, դրա համար իշխանությունները շատ հանգիստ զիջել են»:
Պատգամավորը նշեց, որ կողմ է ղրղըզական փորձի հիման վրա վերահսկողական մակարդակի բարձրացմանը, երբ նոր էլեկտրոնային գրանցման համակարգ է ներդրվում. «Ավելի վստահ կլինենք, որ տեղամասերում խնդիր չկա, բայց տարածքային ցուցակների հետ կապված խնդիրը մնում է»:
Մարուքյանը վստահ է՝ տարածքային ցուցակների հետ կապված՝ իշխանությունը զիջման չի գնալու. «Տարածքների ցուցակների կիրառմամբ քողարկված մեծամասնական ընտրակարգի ադմինիստրատիվ ռեսուրսի կիրառմամբ՝ իշխանությունները փորձելու են հնարավորինս շատ ձայն հավաքել, իսկ դրա դեմ ընդդիմությունը պետք է իր մեխանիզմը, իր մեթոդները հակադրի»:
ՀՕՊ համաձայնագրին, որն օրերս Ազգային Ժողովը վավերացվեց, Էդմոն Մարուքյանը դեմ էր քվեարկել: Նա նշեց, որ բովանդակային քննարկման մեջ չի մտել. «Եթե չկա վստահություն, մենք ունենք ուղղակի թղթեր»: Նրա դիտարկմամբ՝ միայն Ռուսաստանի կողմից Ադրբեջանին զենքի մատակարարման դադարեցման նախապայմանի իրականացման դեպքում կարելի էր ՀՕՊ համակարգի շուրջ համագործակցել: «Մյուս վտանգն էլ այն է, որ հույսներս դնելով օտար կառույցների վրա՝ մեր ազգային, պետական համակարգերը չենք զարգացնում, մենք պետք է մեր ՀՕՊ համակարգը զարգացնենք»,- ընդգծեց պատգամավորը:
Մանրամասները՝ տեսանյութում:
