Ադրբեջանական APA լրատվական գործակալության փոխանցմամբ՝ Ադրբեջանի արտգործնախարար Էմար Մամեդյարովը ԵԱՀԿ գործող նախագահ, Գերմանիայի արտգործնախարար Ֆրանկ Վալտեր Շտայնմայերի հետ համատեղ ճեպազրույցի ժամանակ անդրադարձել է Ղարաբաղյան հակամարտության կարգավորմանը:
«Մենք ցանկանում ենք Ղարաբաղյան հակամարտության խաղաղ կարգավորում, սակայն չպետք է լինեն բանակցություններ բանակցությունների համար:
Բաքվում կանցկացվեն բանակցություններ, իսկ հետո կարող է տեղի ունենալ նախագահների հանդիպում: Կա ֆրանսիական կողմի առաջարկը, մենք դեմ չենք դրան:
Գլխավորն այն է, որ բանակցությունները լինեն արդյունավետ: Եթե մենք ցանկանում ենք առաջընթացի հասնել խաղաղ ճանապարհով, ապա չպետք է լինեն բանակցություններ բանակցությունների համար»,- ասել է Մամեդյարովը՝ ընդգծելով, որ Սանկտ Պետերբուրգում սկսվել են բովանդակային բանակցություններ:
Մամեդյարովը հայտարարել է, որ կա փաստաթուղթ, որոնց շուրջ տարվում է աշխատանք. «Եթե մենք աշխատենք այդ ուղղությամբ, ապա կկարողանանք հասնել խաղաղության: Մեր հարևան Ռուսաստանը ԵԱՀԿ Մինսկի խմբի համանախագահող երկիր է: Նա մեզ մոտ երկիր է:
Հարավային Կովկասում կայունությունը կարևոր է Ռուսաստանի համար: Մենք զենք ենք գնում թե՛ Ռուսաստանից, թե՛ մյուս երկրներից»:
