Իսրայելի պաշտպանության բանակի ռադիոն հունիսի 30-ի առավոտյան սենսացիոն հայտարարություն է արել ԱՄՆ պետքարտուղար Ջոն Քերիի առաքելության տապալման մասին, ով փորձում է վերականգնել Իսրայելի և Պաղեստինի միջև խաղաղ բանակցային գործընթացը:
Ռադիոն հաղորդել է, որ Քերին հետաձգել է Երուսաղեմում կայանալիք մամլո ասուլիսը, որը նախատեսված էր անցկացնել այսօր առավոտյան: Ավելի վաղ հորդանանյան մամուլում հաղորդվում էր, որ Քերին կհայտարարի քառակողմ գագաթնաժողովի մասին, որին կմասնակցեն Իսրայելը, ԱՄՆ-ը, Հորդանանը և Պաղեստինը:
Քերին կփորձի իր այցի վերջին րոպեների ընթացքում մոտեցնել կողմերի դիրքորոշումները: Մամլո ասուլիսի փոխարեն նա հանդես կգա կարճ հայտարարությամբ:
Պաշտոնապես, ըստ իսրայելական մամուլի հաղորդագրության, մամլո ասուլիսը տեղափոխվել է առավոտյան 10.30-ից ավելի ուշ ժամի: Որպես պատճառ հնչեցվել է վերջին պահին խաղաղ բանակցային գործընթացը վերսկսելու փորձը:
Դեռ դժվար է հասկանալ, թե ինչ կարող է անել Քերին մինչև իր մեկնումը մնացած ժամանակ: Հայտնի է, որ պաղեստինցի առաջնորդ Մահումդ Աբասը, որպես բանակցային գործընթացը սկսելու նախապայման, պահանջում է ազատ արձակել պաղեստինյան կալանավորներին, ապամոնտաժել անցակետերը:
