Եվրահանձնաժողովի նախագահ Ժան Կլոդ Յունկերը հունիսի 28-ին հորդորել է Եվրախորհրդարանում բրիտանացի «եվրասկեպտիկներին»՝ վայր դնել պատգամավորական մանդատները՝ նկատի առնելով Մեծ Բրիտանիայում կայացած հանրաքվեի արդյունքները: Այս մասին փոխանցում է RIA Novosti-ն։
«Սրանք ձեր վերջին ծափահարություններն են այստեղ, և ինչ-որ չափով ես իսկապես զարմացած եմ, որ դուք այստեղ եք: Դուք հանդես եք գալիս դուրս գալու օգտին: Մեծ Բրիտանիայի ժողովուրդը քվեարկել է դուրս գալու օգտին, դուք ինչո՞ւ եք այստեղ»,-ասել է նա՝ դիմելով ԵԽ-ի առանձին պատգամավորների, որոնք ծափահարություններով և բացականչություններով իրենց բացասական վերաբերմունքն են դրսևորել Յունկերի ճառի նկատմամբ:
Նա Բրյուսելում ելույթ է ունեցել Եվրախորհրդարանի արտահերթ նստաշրջանում, որը նվիրված էր Մեծ Բրիտանիայի հանրաքվեի արդյունքներին:
Յունկերի խոսքով՝ ինքը «չի թաքցնում տխրությունը» բրիտանացիների որոշման կապակցությամբ, բայց վստահ է, որ ԵՄ-ն կարող է նոր դինամիկա ձեռք բերել՝ չկորցնելով գործընկերային հարաբերությունները Միացյալ թագավորության հետ։
