ԱՄՆ-ն աջակցում է Վիեննայում և Սանկտ Պետերբուրգում Լեռնային Ղարաբաղի հարցով ձեռք բերված համաձայնություններին և անում է հնարավոր ամեն ինչ՝ խնդրի համապարփակ լուծման համար: Այս մասին Aysor.am -ի և «Արմենիա» հեռուստաընկերության հետ հարցազրույցում ասել է ԱՄՆ փոխպետքարտուղարի Եվրոպայի ու Եվրասիայի հարցերով տեղակալ, հայ-ամերիկյան տնտեսական համագործակցության միջկառավարական հանձնաժողովի ամերիկյան մասի համանախագահ Բրիջիթ Բրինքը:
«Մենք փորձում ենք աջակցել Լեռնային Ղարաբաղի հակամարտության կարգավորմանը, անում ենք այն ամենը, ինչ կարողանում ենք համանախագահների և պետքարտուղարության միջոցով», – ասել է նա:
Բրիջիթ Բրինքը ընդգծել է, որ Վաշինգտոնը կողմերին առաջարկում է առաջ շարժվել այն համաձայնությունների շրջանակում, որոնք ձեռք են բերվել մայիսին Վիեննայում և հունիսին Սանկտ Պետերբուրգում Հայաստանի և Ադրբեջանի նախագահների հանդիպման ժամանակ:
«Մենք ամբողջությամբ կոմնակից ենք առաջ շարժվել այն համաձայնությունների շրջանակներում, որ եղել են Վիեննայում և Սանկտ Պետերբուրգում, առաջ շարժվելու վստահության ամրապնդման, ինչպես նաև համապարփակ լուծման համար», – նշել է ԱՄՆ փոխպետքարտուղարի Եվրոպայի ու Եվրասիայի հարցերով տեղակալը:
Նրա խոսքով՝ Լեռնային Ղարաբաղի չլուծված հակամարտությունը խանգարում է Հայաստանին օգտվել իր աշխարհագրական կարևոր դիրքից:
«Այս խնդրի լուծումը մեծ ներուժ կարող է պարունակել Հայաստանի տնտեսության աճի համար: ԱՄՆ-ն իր հերթին անում է այն ամենը, ինչ կարողանում է ԼՂ հարցի լուծման համար», – ասել է Բ.Բրինքը՝ հավելելով, որ ԱՄՆ-ն ամբողջությամբ աջակցում է Հայաստանում տնտեսական զարգացմանը, ինչպես նաև տարածաշրջանային տնտեսական զարգացմանը:
«Հայաստանը տարածաշրջանում կարևոր դիրք ունի, այն խաչմերուկ է Արևելքի և Արևմուտքի համար, ուստի Հայաստանը կարող է խաչմերուկ դառնալ առևտրի, մարդկանց, ծառայությունների համար, ինչը շատ կարևոր է», -ասաց Բ.Բրինքը:
