ԱՄՆ նախագահ Բարաք Օբաման երկրի քաղաքացիներին կոչ է արել չվախենալ ներգաղթյալներից, քանի որ նրանք Ամերիկան դարձնում են ավելի ուժեղ:
«Նրանք ձևավորել են մեր բնավորությունը և մեզ դարձրել ավելի ուժեղ… Իմ խորին համոզմամբ՝ ներգաղթյալներից չպետք է վախենալ: Մենք չպետք է պատերով անջատվենք նրանցից, ովքեր, հնարավոր է, այժմ այնպիսի տեսք չունեն, ինչպես մենք, ովքեր աղոթում են ոչ այնպես, ինչպես մենք, և ովքեր ուրիշ ազգանուն ունեն, քանի որ լինել ամերիկացի ավելին է, քան դա: Մեզ ամերիկացի է դարձնում ընդհանուր գաղափարները`որ մենք բոլորս ստեղծված ենք հավասար, որ մենք բոլորս հնարավորություն ունենք մեր կյանքը դարձնելու այնպիսին, ինչպիսին ցանկանում ենք»,- հայտարարել է Օբաման` ելութ ունենալով հատուկ ուղերձով:
Դրանով նա ակնարկել է Հանրապետական կուսակցությունից ԱՄՆ նախագահի թեկնածու Դոնալդ Թրամփի առաջարկությունը, ով խոստանում է պատ կառուցել Մեքսիկայի սահմանին անօրինական միգրացիայի դեմ պայքարի համար:
Օբաման նաև հիշեցրել է, որ ավելի քան 200 տարի ԱՄՆ-ը ապրել է միգրացիայի մի քանի ալիք, որոնք նպաստել են երկրի զարգացմանը:
«Բոլոր հետազոտությունները ցույց են տալիս, որ լինի իռլանդացի, լեհ, գերմանացի, իտալացի, չինացի, ճապոնացի, մեքսիկացի կամ քենիացի, երկրորդ սերնդում նրանք ամերիկացներ են, նրանք մեզ նման են: Քանի որ մենք միանման տեսք չունենք, և մեր ազգանունները տարբեր են … Սակայն մենք կիսում ենք ընդհանուր արժեքներ, որոնց վրա հիմնված է մեր ազգը»,- ավելացրել է Օբաման, ում հայրը ԱՄՆ- է եկել Քենիայից:
Անօրինական միգրացիայի խնդիրը այսօրվա դրությամբ ԱՄՆ-ում համարվում է ամենահրատապներից մեկը, քանի որ անօրինականները զբաղեցնում են աշխատատեղեր և չեն վճարում հարկեր, որը վնաս է հասցնում տնտեսությանը:
