Վերահսկիչ պալատի վերջին հաշվետվության աղմկոտ ներկայացումը շարունակում է մնալ ներիշխանական քննարկումների հիմնական թեմաներից մեկը: ՎՊ նախագահ Իշխան Զաքարյանի ներկայացրած խախտումներից ու չարաշահումներից զատ, քննարկվում է նաև նույն Ի. Զաքարյանի գործունեությունը: Կարծիքներ են հնչում, որ ՎՊ-ի ու այդ կառույցի նախագահի գործունեությունը նույնպես անբասիր չեն: Այսինքն` ամեն մի հայտնաբերված չարաշահում կամ թալան չէ որ ներկայացվում է հանրությանը, և ներկայացված ամեն մի դեպք չէ, որ համապատասխանում է իրականությանը:
Քննարկումներ են լինում, որ որոշ չարաշահումներ պարզապես չեն ներկայացվում, և դա հավանաբար տեղի է ունենում որոշակի կոռուպցիոն գործարքի կամ պայմանավորվածության արդյունքում, և որ հենց դրա արդյունքում է ավարտին հասցվում Ի. Զաքարյանի մի քանի մլն դոլարանոց տունը: Մյուս կողմից էլ կարծիք կա, թե որոշ խախտումներ ՎՊ նախագահը ուռճացված կամ հետին թվով է ներկայացնում, եթե տվյալ գերատեսչության ղեկավարի հետ չի կարողացել գործարքի մեջ մտնել, կամ նա չի վայելում քաղաքական ամուր հովանավորչություն: Ահա թե ինչու ՎՊ-ի բացահայտումները շատ հաճախ արժանանում են սուր քննադատության: Պարզապես ՎՊ-ի մամլիչի տակ ընկնող պաշտոնյաները չեն համարձակվում ընդդիմանալ՝ մտածելով, որ Ի. Զաքարյանն այդ ամենը անում է նախագահ Սերժ Սարգսյանի հանձնարարությամբ: Ի. Զաքարյանն ինքը ամեն մի հայտարարության ժամանակ մի քանի անգամ հատուկ շեշտում է, որ նախագահին այդ ամենը տեղյակ է պահել:
Հիշեցնենք, որ ՎՊ-ի` կոռուպցիոն, բայց չկայացված գործունեության բացահայտումներից մեկը կատարվեց 2 տարի առաջ, երբ հայտնի դարձավ, որ ՎՊ աշխատակիցները Սպարտակ Մելիքյանին պատկանող բուհում ստուգումներ կատարելու ժամանակ գումար էին պահանջել: Ընդ որում` ՎՊ-ն իրավունք չուներ այդ բուհում ստուգումներ անել, քանի որ այն պետական բյուջեից գումարներ չի ծախսում:
Պատահական չէ, որ իշխանական կուլիսներում տեղեկություններ են շրջանառվում, թե ՎՊ-ում նույնպես տարեցտարի ավելանում են ոչ արդար աշխատանքի կամ գնահատման ծավալները: Օրինակ է բերվում, որ ՎՊ-ն իր ուսումնասիրությունների արդյունքում պետական համակարգի 2008թ. գործունեության մեջ հայտնաբերել է մոտ 8 մլրդ դրամի խախտում, որից վերականգնման ենթակա է եղել մոտ 5,9 մլրդ դրամը, սակայն գումարով վերականգնվել է ընդամենը 2,4 մլրդ դրամը: 852 հազար դրամը վերականգնվել է աշխատանքով, և անարդյունավետ ծախս է համարվել մոտ 1,8 մլրդ դրամի ծախսը: 2009թ. արձանագրել է 7,7 մլրդ դրամի խախտում, որից վերականգնման ենթակա է եղել մոտ 6,5 մլրդ դրամը, բայց գումարով վերականգնվել է 3,2 մլրդ դրամը: Մոտ 2,6 մլրդ-ը վերականգնվել է աշխատանքով, իսկ 1,3 մլրդ դրամի ծախս էլ համարվել է անարդյունավետ: Հենց վերականգնման ենթակա ու վերականգնված գումարների կամ աշխատանքների մեջ եղած տարբերությունն էլ, ասում են, երբեմն ՎՊ-ի և տվյալ հիմնարկի կողմից դառնում է անհասկանալի գործարքի առարկա:
2012թ. էլ ՎՊ-ն արձանագրել է շատ ավելի քիչ` մոտ 1.3 մլրդ դրամի ֆինանսական խախտումներ ու թերություններ, որից վերականգնման ենթակա է եղել մոտ 374 մլն դրամը և անարդյունավետ է համարվել 918 հազար դրամի ծախսը:
Իշխանություններին մոտ կանգնած մեր աղբյուրների փոխանցմամբ` Ի. Զաքարյանի նկատմամբ ներիշխանական դժգոհություն է հասունանում, որի արդյունքում հնարավոր է, որ առաջիկայում բացահայտվեն արդեն ՎՊ-ի կատարած որոշ խախտումները, որոնք տեղի են ունեցել նրա ուսումնասիրությունների ընթացքում:
