Լոնդոնի Սոհո շրջանի ակումբներից մեկում միգրացիոն հարցերով բրիտանացի նախարար Մարկ Հարփերի համար երեկույթն ավարտվել է հիվանդանոցում: Բարի սեղանի վրա պարելիս կառավարության անդամն ընկել է ու կոտրել ոտքը:
«Ինձ հետ էր նաև կինս՝ Մարգարետը, սակայն բարեբախտաբար նա չի ընկել: Նա ավելի լավ պարող է, քան ես»,- ասել է նախարարը Daily Mail-ի լրագրողին:
Միջադեպը տեղի է ունեցել այս ամիս ավելի վաղ, սակայն ճշմարտությունը ջրի երես է ելել այն բանից հետո, երբ հենակներով հազիվ քայլող նախարարի առողջությամբ հետաքրքրվել են լրագրողները:
Նա վստահեցրել է, որ չի դադարեցնի ծառայողական պարտականությունները:
Այսօր նա պետք է այց կատարեր Ալժիր, սակայն նրա գրասենյակից հայտնել են, որ այցը հետաձգվում է առնվազն մինչ հինգշաբթի:
