Արժույթի միջազգային հիմնադրամը նոր հետազոտություն է հրապարակել՝ նախկին ԽՍՀՄ 6 երկրներում ստվերային տնտեսության չափերի վերաբերյալ, համաձայն որի Հայաստանում ստվերային տնտեսության մակարդակը ամենաբարձրն է` 35 %: Ղրղզստանում ստվերային տնտեսությունը ՀՆԱ-ի 26.3 %-ն է կազմում, Վրաստանում` 30.1 %-ը, Ադրբեջանում` 31.5 %-ը, Տաջիկստանում` 32.8 %-ը, իսկ Ղազախստանում` 33 %-ը:
Հայաստանում ստվերային տնտեսություն ծնող հիմնական գործոն է համարվել ֆինանսական և ապրանքային շուկաներում կարգավորման բեռը (45.7 %): 28.8 %-ով ստվերային տնտեսության պատճառ է հանդիսացել ինստիտուտների որակը, 15 %-ով` աշխատաշուկայի կոշտությունը և 10.6 %-ով` հարկային բեռը:
Նշենք նաև, որ թեև հետազոտությունը նոր է հրապարակվել, սակայն այն վերաբերում է երկրների 2008 թվականի տնտեսական ցուցանիշներին։
