Լիբանանյան բանակի զինծառայողները լիարժեք վերահսկողության տակ են վերցրել իրավիճակը Սայդա քաղաքում (Բեյրութից 40 կմ հարավ), որտեղ հունիսի 24-ին զինված ծայրահեղականները խռովություն են բարձրացրել: Գրոհայինների հետ բախումների հետևանքով զոհվել է 16 զինվորական, ավելի քան 100-ը տուժել են:
ITAR-TASS-ի տեղեկություններով՝ առավել կատաղի փոխհրաձգություններ են տեղի ունեցել Բիլյալ բեն Ռաբահ մզկիթի շրջանում: Թաղամասի գրոհից հետո մի քանի տասնյակ գրոհայիններ հանձնվել են: Սակայն նրանց պարագլխին՝ արմատական սուննի քարոզիչ, շեյխ Ահմեդ Ալ-Ասիրին, հաջողվել է թաքնվել:
Սիրիայի ազատ բանակի պաշտոնական ներկայացուցիչը հայտնել է, որ Ալ-Ասիրը Սիրիայում է և գտնվում է ապստամբների ճամբարում:
Սայդա քաղաքում անցկացված հակաահաբեկչական օպերացիայի ընթացքում ոչնչացվել է ծայրահեղական «Ջեբհաթ Ալ-Նուսրա» խմբավորման դաշտային հրամանատարներից մեկը, որը ղեկավարել է Ալ-Ասիրի կողմից կռված վարձկանների գործողությունները: Օպերացիայի ընթացքում հայտնաբերվել է մեծաքանակ զենք-զինամթերք:
Լիբանանի Զինվորական դատախազությունը Ալ-Ասիրի և նրա 123 զինակիցների ձերբակալման հրաման է տվել: Իր հերթին վարչապետ Նաջիբ Միկատին հունիսի 25-ին ազգային սուգ է հայտարարել:
