Թրաֆիքինգի դեմ պայքարում, ըստ ԱՄՆ պետքարտուղար Ջոն Քերիի զեկույցի, Հայաստանը բարելավել է իր դիրքերը՝ 2-րդ խմբից անցում կատարելով 1-ին խումբ: ԱՄՆ Պետքարտուղարությունն այս եզրահանգմանն է եկել մեր օրենսդրական փոփոխությունների ոլորտում Հայաստանի մարտավարության վերլուծության, դատական գործընթացներին, թրաֆիքինգի վերաբերյալ քննարկումներին մասնակցելու արդյունքում։
«Առաջին լրատվական»-ի հետ զրույցում Մարդկանց շահագործման հարցերով խորհրդին կից աշխատանքային խմբի անդամ Դավիթ Թումասյանը լիովին համաձայնեց այս զեկույցի հետ, հավելելով, որ կատարվել է օբյեկտիվ, համապարփակ ուսումնասիրություն, որը ոչ մի կասկած չի առաջացնում: Նա փաստեց, որ ամբողջովին այլ պատկեր է հարևան Վրաստանում, որը երկու տարի անընդմեջ գտնվում էր 1-ին խմբում, իսկ այս տարի իջավ երկրորդ խումբ. «Ասեմ, որ ԱՄՆ դեսպանատան ներկայացուցիչները շատ ակտիվ են Հայաստանում, մասնակցում են դատավարություններին, աշխատանքային խմբերի քննարկումներին, սեմինարներին»:
Դավիթ Թումասյանն ասաց, որ ՀՀ դատախազության պաշտոնական տվյալներով՝ մեզ մոտ 2010-ին գրանցվել է թրաֆիքինգի 13, 2011-ին՝ 16, 2012-ին՝ 19 դեպք. ամեն տարի երեք դեպքով ավելացել է թիվը: Նա «Առաջին լրատվական»-ին փոխանցեց նաև, որ Հայաստանում առավել տարածված է աշխատանքային և սեռական թրաֆիքինգը, ավելի շատ՝ սեռականը: Հայաստանից թրաֆիքինգի զոհերը հիմնականում արտահանվում են Արաբական Միացյալ Էմիրություններ, Թուրքիա, ՌԴ, իսկ օրգանների թրաֆիքինգի դեպքում՝ Շրի Լանկա:
Մեզանում գրանցվել են նաև ներքին թրաֆիքինգի դեպքեր, երբ ՀՀ քաղաքացին իր երկրի ներսում է շահագործվել, և ներկրման դեպքեր, երբ զոհերին դրսից են բերել: Հայաստանում այդպիսի դեպքեր գրանցվել են 2004 թվականին՝ Ուկրաինայից, 2005-ին՝ Ուզբեկստանից և 2009-ին՝ ՌԴ-ից:
Մեր զրուցակիցը ևս մեկ անգամ զգուշացրեց, որ թրաֆիքինգի չենթարկվելու համար պետք է իրազեկված լինել, զգուշավորություն ունենալ, մասնավորապես՝ կասկածելի գործակալությունների միջոցով աշխատանք չփորձել գտնել, չմտածել, թե ապօրինի ճանապարհով ձեռք բերված աշխատանքն անվնաս է և ծանր հետևանքներ չի ունենա. «Երեխաներն ավելի զգոն պետք է լինեն և վստահեն իրենց ծնողներին: Որևէ խնդիր ունենալու դեպքում կիսվեն նրանց հետ: Որքան բարձր լինի անձանց կենսամակարդակը, կայուն լինի սոցիալական, տնտեսական վիճակը, այնքան քիչ խոցելի կլինեն նրանք»:
Հիշեցնենք, որ թրաֆիքինգը լինում է հետևյալ տեսակների՝ սեռական շահագործում, աշխատանքային շահագործում և օրգան-հյուսվածքների ապօրինի վաճառք:
