Համացանցային օգտատերերը սկսել են ավելի քիչ ուշադրություն դարձնել այնպիսի սոցցանցերին, ինչպիսիք են Facebook-ը, Instagram-ը, Twitter-ն ու Snapchat-ը։ Այս մասին հայտնում է Daily Mail-ը՝ հղում անելով SimilarWeb ընկերության հետազոտությանը։
Ընկերությունը հետազոտություն է անցկացրել Մեծ Բրիտանիայում, Ֆրանսիայում, Գերմանիայում, Իսպանիայում, Ավստրալիայում, Հնդկաստանում, Բրազիլիայում, ԱՄՆ-ում և Հարավային Աֆրիկայում մի քանի հազար օգտատիրոջ շրջանում։
Արդյունքում պարզվել է, որ Instagram-ի օգտատերերը սկսել են հրապարակումների և մեկնաբանությունների վրա ծախսել միջինում 23.7 տոկոսով քիչ ժամանակ, քան անցած տարի, Twitter-ի օգտատերերը՝ 23.4 տոկոսով ավելի քիչ ժամանակ, Snapchat-ի դեպքում ժամանակի ծախսի կրճատումը կազմել է 15.7 տոկոս, իսկ Facebook-ի պարագայում՝ 8 տոկոս։
Նշվում է, որ հետաքրքրության անկումը կապված է այն բանի հետ, որ համացանցային օգտատերերի կյանքում գլխավոր տեղ են սկսել զբաղեցնել մեսենջերները, որոնցից ամենամեծ ժողովրդականություն վայելողը WhatsApp-ն է։
