Հնդկաստանի հյուսիսային Ուտարխանդ և Հիմաչալ-Պարդեշ նահանգներում ջրհեղեղների և սողանքների զոհ կարող են դարձած լինել հազարավոր մարդիկ: Այս մասին հայտնում է RIA Novosti-ն՝ հղում անելով տեղի վարչակազմերի աղբյուրներին:
Ներկայում հյուսիսային նահանգներում հաստատված է, տարբեր տվյալներով, 150-182 մարդու մահ: Տեղի լրատվամիջոցները հաղորդում են, որ շուրջ 14 հազար մարդ անհետ կորել է, 60 հազարն էլ հայտնվել են ծայրահեղ իրավիճակում: Իշխանությունների ներկայացուցիչների խոսքով՝ փրկարարական աշխատանքների շարունակման, եղանակային պայմանների բարելավման և տեղումների նվազման ժամանակ զոհերի թիվը կարող է զգալիորեն ավելանալ:
Սողանքները գետնին են հավասարեցրել ուխտավորների հանգստի համար նախատեսված մոտ 90 հատուկ տներ: Աղետի գոտում է հայտնվել նաև զբոսաշրջիկների շրջանում հայտնի Ռիշիկեշ քաղաքը: Ժամանակավոր ճամբարներում են տեղավորվել 33 հազար բնակիչներ:
Երեկ ուղղաթիռով աղետի գոտին ուսումնասիրել են վարչապետ Մանմոհան Սինգհը և իշխող կոալիցիայի ղեկավար Սոնյա Գանդին:
Սինգհի խոսքով՝ իշխանությունները ջանքեր չեն խնայում՝ անելու հնարավորը մարդկանց փրկելու համար:
Փրկարարական օպերացիային մասնակցում են ավելի քան 8000 զինվորականներ, 3000 սահմանապահներ, հարյուրավոր ոստիկաններ, ռազմական և մասնավոր ուղղաթիռներ:
