Ադրբեջանը փորձում է ՄԱԿ տեղափոխել ԼՂ հակամարտության կարգավորման հարցը, քանի որ այնտեղ նրանք ունեն Թուրքիայի և իսլամական պետությունների աջակցությունը և կարող են մանիպուլյացիայի ենթարկել այս խնդիրը: «Առաջին լրատվական»-ի հետ զրույցում նման կարծիք հայտնեց «Թաֆթս» համալսարանի գիտաշխատող Սուրեն Սարգսյանը:
Այնուամենայնիվ, մեր զրուցակիցը չի կարծում, որ Ադրբեջանը այս հարցում հաջողի, քանի որ բանակցային ձևաչափի կոնսենսուս պետք է լինի:
Սուրեն Սարգսյանը բարձր է գնահատում ԼՂՀ ճանաչման ուղղությամբ արտասահմանում մեր լոբբիստական կազմակերպությունների աշխատանը. «Օրինակ՝ ԱՄՆ-ը թեև չի ճանաչել ԼՂՀ-ն, բայց ֆինանսապես օգնել է Լեռնային Ղարաբաղին: Սա աշխարհում չտեսնված դեպք է»:
Ինչ վերաբերում է ԱՄՆ նախագահի թեկնածուներին, ապա Սուրեն Սարգսյանը համոզված է, որ նրանցից ոչ մեկի հաղթանակի դեպքում էլ Հայոց ցեղասպանության ճանաչում ակնկալել չարժե. «Ավելի շուտ Թուրքիան կճանաչի Ցեղասպանությունը, քան ԱՄՆ-ը»:
Մեր զրուցակցի խոսքով՝ ԱՄՆ-ում հայ համայնքի համար միանշանակ չեն, թե այդ թեկնածուներից՝ Հիլարի Քլինթոնից կամ Դոնալդ Թրամփից որը կարող է մեզ համար դրական լինել, որը՝ բացասական. «Սակայն միանշանակ է, որ մեր համայնքը պետք է ակտիվորեն մասնակցի ընտրություններին, հակառակ դեպքում կարող է տպավորություն ստեղծվել, որ հայ համայնքն այլևս գործոն չէ»: