Սիրիայի քրդական ինքնապաշտպանական ուժերը Սիրիայի Մանբիջ քաղաքի շրջանում լոգիստիկ աջակցություն են ցուցաբերում ԴԱԻՇ ահաբեկչական խմբավորման դեմ գործողություններում, իսկ հիմնական դերը այնտեղ խաղում են արաբները, հինգշաբթի հայտարարել է Թուրքիայի նախագահ Ռեջեփ Էրդողանը:
Նախօրյակին Reuters գործակալությունը, հղում կատարելով ամերիկյան ռազմական աղբյուրներին, հայտնել է, որ հազարավոր սիրիացի մարտիկներ ԱՄՆ հատուկ ջոկատայինների աջակցությամբ Սիրիայի հյուսիսային Մանբիջի շրջանում հարձակում են սկսում ԴԱԻՇ-ի զինյալների վրա: Գործողությունները, որոնք կարող են տևել մի քանի շաբաթ, կոչված են կտրելու Սիրիայի տարածքով թուրքական սահմանին ԴԱԻՇ-ի հասանելիությունը, որը զինյալները երկար ժամանակ օգտագործում են դեպի Եվրոպա և հետ զինյալների տեղաշարժի համար:
«Այժմ Սիրիայի դեմոկրատական ուժերի կազմում, իմ տվյալներով, մտնում են Սիրիայի քրդական ինքնապաշտպանական ուժերի շուրջ 450 զինյալ, ինչպես նաև շուրջ 2500 արաբ: Ընդհանուր առմամբ՝ գործողությանը մասնակցում է շուրջ 3000 մարդ: Մենք բանակցություններ ենք վարել ամերիկացի զինվորականների հետ: Նրանք մեզ ասում են, որ քրդական ուժերը լոգիստիկ աջակցություն են հատկացնում գործողության ընթացքում, իսկ հիմնական դերը կատարում են արաբները: Մեր հետախուզությունը հետևում է այն ամենին, ինչ այնտեղ տեղի է ունենում»,- ասել է Էրդողանը իր Քենիա այցի ժամանակ` Նայրոբիում մամլո ասուլիսում:
