Բրիտանական Reuters լրատվական գործակալության փոխանցմամբ՝ ԵՄ-ն հետաձգել է Վրաստանի հետ վիզային ռեժիմի ազատականացման մասին որոշման ընդունումը։ Այդ մասին գործակալությանը հայտնել են նրա դիվանագիտական աղբյուրները։
ԵՄ երկրների պատվիրակությունը չորեքշաբթի քննարկել է տվյալ հարցը, սակայն հետաձգել է վերջնական որոշման ընդունումը։ Հաղորդվում է, որ Վրաստանի հետ նման համաձայնագրին դեմ են արտահայտվել Ֆրանսիան ու Գերմանիան։
Լրատվամիջոցի զրուցակիցը հայտարարել է. «Մենք չենք ցանկանում կանգնեցնել ողջ գործընթացը։ Մենք պարզապես ցանկանում ենք լինել ավելի զգուշավոր»։
Եվրոպացի դիվանագետները Վրաստանի հետ վիզային ռեժիմի քննարկմանը կվերադառնան հաջորդ շաբաթ՝ նախքան Ուկրաինայի վերաբերյալ բանակցություններ սկսելը, որի հետ սպասվում են ավելի բարդ բանակցություններ։
Եվրոպական հանձնաժողովը 2015 թվականի դեկտեմբերին հայտարարել էր, որ Վրաստանն ու Ուկրաինան կատարել են վիզային ռեժիմի ազատականացման վերաբերյալ բոլոր պայմանները։
